बलिउड अभिनेता सिद्धान्त चतुर्वेदी अभिनीत फिल्म 'युध्रा' ले बक्स अफिसमा औसत कमाइ गरिरहेको छ।
भारतीय सञ्चारमाध्यमका अनुसार फिल्मले दुई दिनमा १० करोड ५० लाख भारू कमाएको छ। ४ करोड ५ लाखमा ओपनिङ गरेको फिल्मले दोस्रो दिन ६ करोड भारू कमाएको हो। यस फिल्मको बजेट ५० देखि ६० करोड बताएको छ।
रवि उदयावरले निर्देशन गरेको फिल्ममा सिद्धान्तसँगै मालविका मोहनन, राघव जुयाल, राम कपूरलगायत कलाकारको अभिनय छ। फिल्मलाई रितेश सिधवानी र फरहान अख्तरले निर्माण गरेका हुन्।
युध्रापछि सिद्धान्त 'धडक २' मा देखिनेछन्। करण जोहरले निर्माण गर्ने फिल्ममा सिद्धान्त र तृप्ति डिमरीको अभिनय रहनेछ। यो सन् २०१८ मा आएको फिल्म 'धडक' को सिक्वेल हो।
