दक्षिण भारतीय अभिनेता सूर्या आगामी फिल्म 'कंगुवा' लाई लिएर चर्चामा छन्।
फिल्ममा उनीसँगै बलिउड अभिनेता बबी देओलको पनि अभिनय छ। फिल्ममा उनी भिलेनको भूमिकामा देखिँदैछन्। हालै फिल्मको ट्रेलर सार्वजनिक गरिएको थियो। जसले निकै चर्चा पाइरहेको छ। यो फिल्म १० अक्टोबरमा रिलिज हुने भनिएको थियो। तर दक्षिण भारतीय अभिनेता रजनीकान्तको फिल्म 'वैट्टैयान' कारण रिलिज डेट सरेको छ।
भारतीय सञ्चारमाध्म दैनिक भास्करका अनुसार दुवै फिल्म एकै मितिमा रिलिज हुँदा शो बाँडफाडमा समस्या आउने भएपछि 'कंगुवा' को प्रदर्शन मिति सारिएको हो। यस फिल्मको नोभेम्बर १४ देखि प्रदर्शन हुनेछ।
बिहीबार निर्माण टिमले फिल्मको एक पोस्टर सार्वजनिक गर्दै उक्त जानकारी दिएका हुन्।
सिरुथाई शिवा निर्देशित फिल्म 'कंगुवा' मा सूर्या र बबीसँगै दिशा पटानीको मुख्य भूमिका छ। फिल्मलाई स्टुडियो ग्रीन र यूवी क्रिएशन्सले निर्माण गरेको हो।
