बलिउड निर्देशक विशाल भारद्वाजले नयाँ फिल्म निर्माण घोषणा गरेका छन्।
भारतीय सञ्चारमाध्यम दैनिक जागरणका अनुसार फिल्ममा शाहिद कपूर र तृप्ति डिमरीको मुख्य भूमिका रहनेछ। फिल्मका निर्माता साजिद नाडियावालाले इन्स्टाग्राममा एक पोस्ट सेयर गर्दै उक्त जानकारी दिएका हुन्।
'म प्रतिभाशाली निर्देशक, मेरो प्रिय साथी विशाल भारद्वाज र शक्तिशाली शाहिद कपूरसँग मिलेर काम गर्न उत्साहित छु। प्रतिभाशाली तृप्ति डिमरीलाई हाम्रो फिल्ममा स्वागत गर्न चाहन्छु,' उनले लेखेका छन्।
यस फिल्मको नाम खुलाइएको छैन। शाहिद हाल आफ्नो आगामी फिल्म 'देवा' को छायांकनमा व्यस्त छन्। त्यस्तै तृप्ति डिमरी आगामी फिल्म 'विक्की विद्याका वो वाला भिडिओ' मा देखिदैछिन्। यो फिल्म ११ अक्टोबरदेखि रिलिज हुँदैछ।
