यतिबेला बलिउड अभिनेत्री कंगना रनावत आगामी फिल्म 'इमरजेन्सी' लाई लिएर चर्चामा छिन्।
शिख समुदायले उनको फिल्मविरूद्ध विरोध प्रदर्शन गरिरहेका छन्। यसैबीच कंगनाले सामाजिक सञ्जाल एक्स मार्फत नयाँ फिल्मको घोषणा गरेकी छन्। सोमबार उनले फिल्म 'भारत भाग्य विधाता' घोषणा गरेकी हुन्।
'ठूलो पर्दामा वास्तविक जीवनको वीरताका जादू अनुभव गर्नुस्। भारत भाग्य विधाताको घोषणा गर्न पाउँदा निकै खुशी लागिरहेको छ। जुन गुमनाम नायकलाई सिनेमाई श्रद्धाञ्जली हो,' उनले लेखेकी छन्।
मनोज तापडियाको निर्देशन र लेखन रहने फिल्ममा बबीता आशिवाल र आदि शर्माको लगानी रहनेछ। युनोइया फिल्म्स र फ्लोटिङ रक्स एन्टरटेनमेन्टको ब्यानरमा बन्ने फिल्ममा कंगनाको मुख्य भूमिका रहनेछ।
