दक्षिण भारतीय अभिनेत्री साई पल्लवी बलिउडमा डेब्यू गर्दैछिन्। उनले फिल्म 'रामायण' बाट बलिउडमा डेब्यू गर्न लागेकी हुन्।
साई पल्लवीले सन् २०१५ मा मलयालम फिल्म 'प्रेमम' बाट अभिनयमा डेब्यू गरेकी थिइन्। उनले 'काली, फिदा, मिडिल क्लास, मारी, अथिरन, पावा कढाइगल, लभ स्टोरी, श्याम सिंघा राय' लगायत फिल्ममा काम गरेकी छन्। उनले छोटो समयमै राम्रो चर्चा बटुल्न सफल भइन्। उनलाई लिएर फिल्म बनाउन चाहने निर्माताहरूको लाइन लामो छ।
भारतीय सञ्चारमाध्यम एनडिटिभीका अनुसार साई पल्लवीले आफ्नो पारिश्रमिक दोब्बर बढाएकी छन्। उनी दक्षिण भारतीय फिल्मका लागि ४ करोड भारू पारिश्रमिक लिन्थिइन्। 'रामायण' को लागि उनले १० करोड भारू पारिश्रमिक लिने बताइएको छ।
नितेश तिवारीको निर्देशन रहने फिल्ममा अभिनेता रणवीर कपूर रामको भूमिकामा देखिनेछन् भने 'केजिएफ' अभिनेता यश रावणको भूमिकामा देखिनेछन्।
त्यस्तै हनुमानको भूमिकामा सनी देओल र कुम्भकर्णको भूमिकामा बबी देओल देखिने चर्चा छ। रावणका भाइ विभीषणको भूमिकामा अभिनेता विजय सेतुपति देखिने भएका छन्।
निर्देशक नितेश, मधु मन्टेना, नमित मल्होत्रा र अल्लू अरविन्दको लगानी रहने फिल्म तीन भागमा बन्ने बताइएको छ।
प्यान इन्डियाको फिल्म सन् २०२५ प्रदर्शन हुनेछ।
