भारतीय कमेडियन कपिल शर्माले नयाँ शो ल्याएका छन्।
शनिबारदेखि नेटफ्लिक्समा उनको शो 'द ग्रेट इन्डियन कपिल शो' स्ट्रिमिङ हुन थालेको छ। पहिलो एपिसोडमा रणवीर कपुर, नीतू कपुर र रिद्दिमा कपुर अतिथि थिए। शोमा उनीहरूले आफ्नो बाल्यकालका रमाइलो किस्सा पनि सेयर गरेका थिए।
रणवीरले बाल्यकालमा आफ्नी दिदी रिद्दिमालाई कुट्ने गरेको बताए। 'अहिले नराम्रो लाग्छ तर मैले बाल्यकालमा दिदीलाई धेरै कुटेको छु।' यसैमा नीतुले थप्दै भनिन्, 'जब म बाहिर जान्थे तब रणवीरलाई मेरो छोरीलाई हात लगाउने होइन भन्थे।'
शोमा कपिलसँगै अर्चना पुरण सिंह, कृष्ण अभिषेक, कीकू शारदा र सुनील ग्रोवरलगायतले प्रस्तुति दिइरहेका छन्। ६ वर्षपछि शोमा सुनील ग्रोवरले कमब्याक गरेका हुन्।
कपिल र सुनीलबीच झगडा भएपछि सुनीलले शो छाडेका थिए। सुनीललाई कपिलले जहाजमा दुर्व्यवहार गरेका थिए। यो विवाद बढ्दै गएपछि सुनीलले शो छाडेका हुन्।
