बलिउड स्टार सलमान खान अभिनीत फिल्म 'ब्याटल अफ गलवान' को गीत शनिबार सार्वजनिक भएको छ।
'मातृभूमि' बोलको उक्त गीतमा नेपाली अभिनेता अनुपविक्रम शाही सलमान खानसँगै देखिएका छन्। देशभक्ति भावना समेटिएको उक्त गीतमा अनुपविक्रम सलमानसँग एउटै फ्रेममा देखिएका हुन्। यसले फिल्ममा उनको भूमिका महत्वपूर्ण र प्रभावकारी रहेको हुनसक्ने अनुमान गर्न सकिन्छ।
'मातृभूमि' गीतमा अरिजित सिंह, श्रेया घोषाल र मणि धर्मकोटको आवाज छ।
'ब्याटल अफ गलवान' अनुपको बलिउड डेब्यु हो।
सलमान खान फिल्मसको प्रस्तुति रहेको यो वार ड्रामा अपूर्व लाखियाले निर्देशन गरेका हुन्। फिल्म सन् २०२० मा गलवान क्षेत्रमा भारत र चिनियाँ सेनाबीच भएको झडपको कथावस्तुमा आधारित छ।
भारत र चीनको सीमा क्षेत्रको गलवान उपत्यकामा सैन्य झडप भएपछि भारत र चीनको सम्बन्ध बिग्रिएको थियो। हतियारबीना भएको सो झडपको कथामा आधारित रहेर यो फिल्म निर्माण भएको बताइएको छ।
फिल्ममा सलमान खान, चित्रांगदा सिंहको शीर्ष अभिनय छ। साथमा नेपाली अभिनेता अनुपसँगै स्वर्गीय गायक तथा अभिनेता प्रशान्त तामाङको पनि अभिनय छ।
'ब्याटल अफ गलवान' १७ अप्रिल (बैशाख ४) देखि प्रदर्शनमा आउने तयारीमा छ।
