शुक्रबारदेखि दुईवटा नेपाली फिल्म प्रदर्शनमा आएका छन्।
हरिवंश आचार्य अभिनीत 'भूठान' र सुरक्षा पन्त अभिनीत 'खेल' देशभरका सिनेमा हलहरूमा प्रदर्शनमा आएका हुन्।
'भूठान' लाई विनोद पौडेलले लेखन तथा निर्देशन गरेका हुन्। सम्पूर्ण छायांकन अमेरिकामा गरिएको यो फिल्ममा हरिवंशसहित अदिति प्याकुरेल, दयाहाङ राई, जोएस पाण्डे, ऋचा घिमिरे, पूजा चन्द, अनुराधा मजुमदार, विमल सुवेदी, टक क्रेन र हलिउड अभिनेता ब्रुस डर्नको समेत अभिनय छ।
भुटानी शरणार्थीहरूको कथामा बनेको फिल्मको निर्मातामा अविरल थापा, राजेन्द्र ठकुराठी, अमिताभ जोशी, सुशांक मैनाली, किर्तना बाँस्कोटा र विनोद पौडेल छन्।
त्यस्तै, फिल्म 'खेल' लाई अनुराग प्रधान र आस्था श्रेष्ठले निर्देशन गरेका हुन्। मिथिकल सस्पेन्स थ्रिलर जनराको यो फिल्ममा सुरक्षा पन्तसँगै हेना नगरकोटी, मोनिका थापा, निकिता आचार्य, समापिका गौतमलगायतको अभिनय छ।
यसको निर्मातामा लुइसराज महर्जन र आशिषराज महर्जन छन्। कथा आशिषराज महर्जनले लेखेका हुन् भने पटकथा अभितेन्द्र र अनुराग प्रधानले तयार पारेका हुन्।
यसअघि रिलिज 'पिताम्बर', 'अञ्जिला', 'वसन्त' लगायतका नेपाली फिल्महरू पनि हलमा छन्।
