कुमार कट्टेल निर्देशित फिल्म 'लाज शरणम्' ले प्रदर्शनको ५१ औं दिने मनाउने भएको छ।
फागुन १४ गते रिलिज फिल्म मंगलबार ४९ औं दिनमा ११ वटा हलमा प्रदर्शनरत छ।
बीएसआर मुभिज, क्युएफएक्सको सिभिल र भाटभटेनी भक्तपुर, बिग मुभिज, आइएनआई सिनेमा, एफक्युब सिनेमा, रञ्जना सिनेप्लेक्स लगायतका हलमा फिल्म प्रदर्शनरत छ। काठमाडौं बाहिर पनि केही हलमा फिल्म लागिरहेको छ।
फिल्मले यही बिहीबार प्रदर्शनको ५१ औं दिन पूरा गर्न लागेको हो।
कतिपय फिल्म हलमा केही दिन टिक्न मुस्किल भइरहेको समयमा ५१ दिन मनाउनु आफैमा एउटा महत्वपूर्ण उपलब्धि हो।
'लाज शरणम्' मा सीताराम कट्टेल, विजय बराल, अर्पण थापा, महेश त्रिपाठी, अर्जुन घिमिरे, सागर लम्साल, हरि निरौला, मुकुन्द श्रेष्ठ, विजय लामा, कमलमणि नेपाल, रेणुनाथ योगी, प्रियाना आचार्य लगायतको अभिनय छ।
चर्चित हास्य टेलिश्रृंखला 'सक्किगोनी' को टीमले निर्माण गरेको 'लाज शरणम्' को निर्माता नबिन श्रेष्ठ हुन्।
चलचित्र विकास बोर्डका अनुसार यो फिल्मले बक्स अफिसमा ४ करोड ३४ लाख रूपैयाँ कमाइ गरेको छ। यद्यपि यो केही साताअघिसम्मको कमाइ हो। निर्माणपक्षले ६ करोड माथिको कलेक्सन भएको जनाएको छ।
'लाज शरणम' ले कर्णालीको कथाव्यथा प्रस्तुत गरेको छ।
फिल्म रिलिज भएसँगै 'सक्किगोनि' सिरियलको प्रसारण भने रोकिएको छ। छिट्टै सिरियलको नयाँ सिजन लिएर आउने 'जिग्री–पाँडे' ले बताएका छन्।
