आज शुक्रबार हलमा नेपाली फिल्म 'वसन्त' प्रदर्शनमा आएको छ।
प्रकाश सपूतको डेब्यू निर्देशकिय फिल्म 'वसन्त' सहित विदेशी फिल्म 'अ माइनक्राफ्ट मुभी' हलमा लागेका हुन्।
मल्टिप्लेक्स हलहरूले यो फिल्मलाई उच्च शो दिएका छन्। गीतलाई समेत फिल्मी शैलीमा निर्माण गर्दै आएका प्रकाशको 'वसन्त' निर्देशकका हिसाबले पहिलो फिल्म भएकाले चासोका साथ हेरिएको छ। फिल्मको सार्वजनिक ट्रेलर र गीतले पनि राम्रो हाइप बनाइरहेका छन्।
यो फिल्ममा प्रकाश सपुत र स्वस्तिमा खड्का शीर्ष भूमिकामा छन्। साथमा प्रभात पाल ठकुरी, श्री शिभान्सी, उर्मिला लाम्गादे, खड्ग बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारीलगायत कलाकारको अभिनय छ।
फिल्मको कथा र संगीत प्रकाश सपुत स्वयंको हो। निर्मातामा मोहन विश्वकर्मा र विन्दु बोहोरा छन् भने बिरेन्द्र नारायण श्रेष्ठ, अनुरोध भट्टराई र नाना थकाली कार्यकारी निर्माता हुन्।
त्यस्तै हलिउड फिल्म 'अ माइनक्राफ्ट मुभी' एक्सन, कमेडी र एडभेन्चर जनरामा बनेको हो। जारेड हेस निर्देशित यस फिल्ममा जेनिफर कुलिज, जेसन मोमोआ, एम्मा मायर्स मुख्य भूमिकामा छन्।