बलिउड निर्देशक तथा अभिनेता अनुराग कश्यपले नेपाली फिल्म 'राजागंज' र यसका निर्देशक दीपक रौनियारको प्रशंसा गरेका छन्।
एक भिडिओ सन्देशमार्फत अनुरागले दीपक निकै कुशल फिल्ममेकर भएको बताएका छन्। दीपकको फिल्ममा जोडिन् पाउँदा गर्व लागेको उनले बताएका छन्।
गत शुक्रबारदेखि प्रदर्शनमा आएको फिल्म 'राजागंज' मा अनुराग 'कार्यकारी निर्माता' का रूपमा छन्।
उनले दीपकको अघिल्लो फिल्म रिलिजदेखि आफूहरूबीच कुराकानी हुन थालेको भन्दै आफू दीपकको ठूलो फ्यान भएको बताएका छन्।
अनुरागले दीपक र मीनबहादुर भाम आफूलाई मनपर्ने नेपाली निर्देशक भएको भिडिओमा बताएका छन्।
केही समयअघि फिल्म 'शाम्बाला' को प्रिमियरमा नेपाल आएका अनुरागले त्यसबेला पनि दीपक र मीन भामको खुलेर तारिफ गरेका थिए।
उनले 'पूजा सर, राजागंज' आफूले हेरेको बताउँदै भनेका छन्, 'यो राम्रो थ्रिलर र सोसल ड्रामा हो। यो नेपालको फिल्म हो। यसमा नेपाली नागरिकको जिन्दगी देखिन्छ। यसमा नेपाल देखिन्छ। यो नेपाली फिल्म नेपालमा मात्र नभइ भारतमा बसेर पनि रिलेट गर्न सकिन्छ। साउथ इस्ट एसियाका जनता रिलेट गर्न सक्छन्। निकै राम्रो फिल्म छ।'
नेपालको फिल्म धेरै माथि जान सक्ने र जानुपर्ने बताउँदै उनले राजागंज हेर्न नेपाली दर्शकलाई आग्रह गरेका छन्। दर्शकको साथ पाए फिल्म धेरै माथि जान सक्ने बताए।
उनले आफू दीपकको ठूलो फ्यान भएको दोहोर्याउँदै भनेका छन्,–'तिमी फिल्म बनाइरहनू, यस्तै फिल्म बनाइरहनूँ।'
दीपकजस्ता फिल्ममेकरसँग जोडिन पाउँदा गर्व महसुस हुने उनले बताएका छन्।
उनले फिल्म रिलिजका लागि बधाईं दिँदै हर्नका लागि नेपाली दर्शकलाई आग्रह गरेका छन्।
दीपक रौनियार निर्देशित 'राजागंज' मा आशा मगराती, दयाहाङ राई, विजय बराल, निकिता चाण्डक, आरती मण्डल, गौमाया गुरूङ लगायत कलाकारहरूको मुख्य अभिनय छ।
यो पनिः यसरी जोडिए अनुराग कश्यप नेपाली फिल्म निर्देशक दिपक रौनियारसँग
