गायक तथा अभिनेता प्रकाश सपुत निर्देशित फिल्म 'वसन्त' को गीत 'बिना स्वादैको' सार्वजनिक गरिएको छ।
शनिबार बेलुका सार्वजनिक गीतमा गायक देवेन्द्र बब्लु (दि फिरन्ते)को स्वर, गायक तथा निर्देशक प्रकाश सपुत र देबेन्द्र बब्लुको शब्द तथा संगीत छ। गीतमा संगीत संयोजनको काम योगेश काजीले गरेका छन्।
भिडिओमा फिल्मका मुख्य कलाकारद्धय प्रभात पाल ठकुरी, श्री शिभान्सीसँगै गायक देवेन्द्र बब्लु र मुख्य सहायक निर्देशक सुनिल विक तथा कलाकार विशाल पहारी प्रस्तुत छन्।
हरर रोमान्टिक थिममा तयार पारिएको गीतको भिडिओले दर्शकमाझ कौतुहलता पैदा गर्ने देखिन्छ। एक जोडीको अन्तरजातिय प्रेम पश्चात परिवारले उनीहरूको मोहनी फुकाउन गर्ने विभिन्न घटनालाई भिडिओमा देखाइएको छ।
फिल्म 'वसन्त' मा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे, खड्क बहादुर पुन (खबपु), अनुप बराल, कमलमणी नेपाल, प्रकाश घिमिरे लगायतका कलाकारको अभिनय छ।
गलबन्दी प्रोडक्सनको प्रस्तुति रहेको सोसल ड्रामा फिल्मको कथा, पटकथा र संगीत पनि सपुतले नै तयार पारेका हुन्। विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा फिल्मले भन्नेछ। फिल्मको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन्।
गायक तथा निर्देशक सपुतको जन्मथलो बागलुङ, काठमाडौं र तराईका विभिन्न ठाउँमा छायांकन गरिएको फिल्म सुसन प्रजापतिले खिचेका हुन्।
'वसन्त' चैत २२ गते चैते दसैंको अवसरमा नेपालभरका हलमा रिलिज हुँदैछ।
