टिभी सिरियलका चर्चित कलाकार राजु पौडेल (राजु मास्टर) ले आफूले बनाएको नयाँ घरको भित्तामा युट्युबको लोगो डिजाइन गरेका छन्।
उनको घर देख्ने जो कोहीलाई आश्चर्य लाग्न सक्छ — राजुले किन यसरी भित्तामा युट्युबको लोगो राखे?
यसपछाडि डिजिटल आम्दानीको कुरा जोडिएको छ।
सेतोपाटीसँगको कुराकानीमा उनले भने, 'कति कलाकारहरू युट्युबबाट राम्रो कमाइ गरे पनि खुलेर भन्नुहुन्न। मैले छोटो समयमै युट्युबबाट मात्रै कमाएको पैसाले घर बनाएको हुँ। यसमा गर्व लाग्छ। त्यही कारण पनि युट्युबको लागो राखेको हुँ।'
राजुले ललितपुरको चापागाउँमा घर बनाएका छन्। चार वर्षअघि घर बनाए पनि अहिलेसम्म सरिसकेका भने छैनन्।
काठमाडौं रानीवनमा भाडाको घरमा बसिरहेका उनले यो घरमा आफूले ल्याइरहेको सिरियल 'सकस' को सुटिङका लागि स्टुडिओ बनाएका छन्।
राजु यति बेला एकसाथ दुई चर्चित सिरियलमा देखिँदै आएका छन्।
उनी मरिचमान श्रेष्ठसँग मिलेर 'जुठे' सिरियल दर्शकमाझ ल्याइरहेका छन्। यसमा लेखन तथा निर्देशन राजु र मरिचमानको छ।
अर्को, उनले आफ्नै च्यानलमा, आफ्नै लेखन तथा निर्देशनमा 'सकस' सिरियल ल्याउँदै आएका छन्।
दर्शकको मन जित्न सक्ने हो भने डिजिटल आम्दानीबाट छोटो समयमै पनि सम्पत्ति जोड्न सकिन्छ भन्ने सन्देश राजुले दिएका छन्।
उनको 'मास्टर टिभी' युट्युब च्यानलमा १७ लाख बढी सब्सक्राइबर्स छन्।
