चर्चित हास्य सिरियल 'सक्किगोनि' यो साता प्रसारणमा नआउने भएको छ।
सिरियलको टिमले सामाजिक सञ्जालमा सूचना जारी गर्दै यस्तो जानकारी दिएको हो। यो सिरियल हरेक बिहीबार बेलुका ९ बजे प्रसारणमा आउने गरेको थियो।
उच्च अदालत पाटनले फिल्म 'लाज शरणम्' को प्रचारप्रसारमा रोक लगाएपछि सिरियलको प्रसारण पनि प्रभावित हुने भएको हो।
'लाज शरणम्' फिल्म 'सक्किगोनि' टिमले बनाएको हो।
'अदालतले हाम्रो चलचित्र ‘लाज शरणम्’ को प्रचारप्रसारमा रोक लगाएपछि हामीले चलचित्र प्रचारप्रसारको निम्ति छायांकन गरिसकेको टेलिसिरियल ‘सक्किगोनि’ को ९१ औं भाग अदालतको आदेशलाई आत्मसाथ गर्दै प्रसारण गर्न असमर्थ भएका छौं,' कुमार कट्टेल र अर्जुन घिमिरे लगायतले फेसबुकमा लेखेका छन्।
पूर्वमन्त्री मोहम्मद अफताब आलमले दायर गरेको रिटको सुनुवाई गर्दै पाटन उच्च अदालतले मंगलबार सामाजिक सञ्जाल र सञ्चारमाध्यममा फिल्मको प्रचारप्रसार नगर्न अन्तरिम आदेश दिएको थियो।
फिल्मका कलाकार सीताराम कट्टेलले निर्वाह गरेको पात्रको आवरण आफूसँग मिलेको भएकोले त्यसको प्रचार रोक्न भन्दै आलमले रिट दायर गरेका थिए।
