नेपाली फिल्म 'छक्का पञ्जा ५' अस्ट्रेलियामा पनि रिलिज तयारीमा छ।
त्यहाँका ५० भन्दा बढी सिनेमा हलमा यो फिल्म प्रदर्शन हुने अस्ट्रेलियाका प्रदर्शक शीतल गिरीले जानकारी दिएका छन्। फिल्मलाई अस्ट्रेलियामा बक्स अफिस रिलिज गर्न लागिएको हो।
त्यस्तै, जापानमा पनि फिल्म प्रदर्शन हुनेछ। त्यहाँका ४५ वटा सहरमा फिल्म प्रदर्शन हुन लागेको जापानमा प्रदर्शनको आयोजना गरेको कम्पनी भिजोनियाका सञ्चालक सुवास लामिछानेले जानकारी दिए।
उनका अनुसार अक्टोबर १३ मा टोकियोस्थित मेगुरो पर्सिमन हलमा फिल्म देखाइनेछ भने अन्य ४४ सहरमा फरक–फरक मितिमा प्रदर्शन गरिनेछ। अन्य सहरहरूमा पनि विभिन्न मितिमा फिल्म प्रदर्शन गरिने उनले बताए।
दीपाश्री निरौलाको निर्देशन रहेको 'छक्का पञ्जा ५' मा दीपकराज गिरी, केदारप्रसाद घिमिरे, वर्षा सिवाकोटी लगायत कलाकारहरूको अभिनय छ।
यो फिल्म दसैंको फूलपाती अर्थात असोज २४ गते रिलिज हुने तयारीमा छ।
