अभिनेता नाजिर हुसेन अभिनीत फिल्म 'गुन्यो चोलो- कमिङ अफ अ्याज अफ अ गर्ल' उर्फ 'गुलाबी' को प्रदर्शन मिति घोषणा गरिएको छ।
बिहीबार पोस्टर सार्वजनिक गर्दै फिल्मको प्रदर्शन मिति घोषणा गरिएको हो। यो फिल्म कार्तिक ९ गतेदेखि प्रदर्शन हुनेछ।
सार्वजनिक पोस्टरमा नाजिर हुसेन पारलैंगिक महिला (ट्रान्सवुमन) को अवतारमा देखिएका छन्। नाजिरले यस फिल्मको लागि आफ्नो १६ केजी तौल घटाएका थिए।
समुन्द्र भट्ट निर्देशित फिल्ममा नाजिरसँगै सञ्चिता लुइँटेल, सुशिल सिटौला, राजकुमार घोष, शिशिर राणा, अनुपम श्रेष्ठ, विशाल पहारीलगायत कलाकारको अभिनय छ। फिल्मको पटकथा तथा संवाद समुन्द्र भट्ट र नाजिर हुसेनले तयार पारेका हुन्।
दि स्काइ ओसन इन्टरटेन्मेन्टको ब्यानरबाट निर्माण भएको फिल्ममा अमेरिकी कम्पनी भिजन इन्टरटेनमेन्टको सहकार्य छ।
भद्र भुजेल एसोसिएट निर्देशक रहने फिल्ममा पुष्कर लामाको निर्माण नियन्त्रण रहनेछ भने निर्माण व्यवस्थापकमा यम ओली छन्। फिल्मलाई आलोक शुक्लाले छायांकन गरेका हुन्।
