स्वस्तिमा खड्का र निश्चल बस्नेतको निर्माण रहेको फिल्म 'बेहुली फ्रम मेघौली' को थिम गीत सार्वजनिक गरिएको छ।
शुक्रबार सार्वजनिक 'बिहे गर्ने कि नगर्ने ?' गीतमा थुप्रै चर्चित कलाकारहरूलाई देख्न सकिन्छ।
र्याप शैलीमा तयार गीतमा कुशल पोखरेलको शब्द र प्रस्तुति छ। रोहित शाक्य गीतका संगीत निर्माता हुन्।
भिडिओमा स्वस्तिमा र निश्चलका साथमा दीपाश्री निरौला, प्रदीप खड्का, धीरज मगर, नाजिर हुसेन, साम्राज्ञी राज्यलक्ष्मी शाह, बेनिशा हमाल, शिल्पा मास्के लगायत कलाकारहरू देखिएका छन्।
स्वस्तिमा खड्काको कन्सेप्ट र निश्चल बस्नेतको निर्देशनमा यो गीत तयार भएको हो।
यो गीत सार्वजनिकसँगै फिल्मको प्रदर्शन मिति समेत घोषणा गरिएको छ।
फिल्म असोज १७ गतेदेखि प्रदर्शनमा आउने भएको छ।
यसअघि दसैंमा आउने भनिए पनि प्रदर्शन मिति नतोकिएको फिल्मलाई घटस्थापनाको दिनमा रिलिज गर्ने निर्णय गरिएको हो।
'बेहुली फ्रम मेघौली' साजन काफ्ले र आकाश बरालको लेखन एवं निर्देशनमा तयार फिल्म हो। यसमा निश्चल र स्वस्तिमासहित बसुन्धरा भुसाल, विजय बराल, रक्षा थापा, सिम्रन खड्का, आमिर गौतम, लोकेन्द्र लेखकलगायत कलाकारको पनि अभिनय छ।
ब्ल्याक हर्स पिक्चर र मेघौली फिल्मस्को प्रस्तुतिमा फिल्म निर्माण भएको हो।
शंकर पाण्डे र फिरोज खड्का यसको कार्यकारी निर्माता हुन्।
फिल्मले विवाहको कथा भन्नेछ।
