दिनेश राउतको निर्देशन रहने फिल्म 'पूजार सार्की' को फर्स्ट लुक पोस्टर सार्वजनिक गरिएको छ।
आइतबार फर्स्ट लुक पोस्टर सार्वजनिक गर्दै निर्माण टिम फिल्म छायांकन गर्न निस्किएका छन्। यस फिल्मको छायांकन मंगलबारदेखि कास्कीमा हुनेछ। सार्वजनिक पोस्टरमा अभिनेता आर्यन सिग्देल, प्रदीप खड्का र पल शाहलाई प्रस्तुत गरिएको छ। पोस्टर डिजाइन रोयल भिमसेनले गरेका हुन्।
फिल्ममा अभिनेत्री अन्जना बराइली र परीक्षा लिम्बुको पनि अभिनय रहनेछ। अन्जनाले यसअघि फिल्म 'महापुरुष' मा अभिनय गरेकी थिइन्। परीक्षाले 'जारी' र 'छक्का पन्जा ४' मा अभिनय गरेकी छन्। उनीहरूसँगै मोहन निरौला, लोकेन्द्र लेखक, सुबास गजुरेल, विद्या कार्की, तारा शर्मा, शंकर आचार्य, प्रेम सुब्बा, गोविन्द रमण पराजुलीलगायत कलाकारको अभिनय रहनेछ।
किङडम नेटवर्क प्रोडक्सनबाट बन्ने फिल्ममा सुभाष भुषालको लगानी रहनेछ। फिल्मको कथा विकास सुवेदीले लेखेका हुन्। राउत र सुवेदीले यसअघि फिल्म 'प्रकाश' मा सहकार्य गरेका थिए।
'पूजार सार्की' लाई सुप्रिम पराजुलीले सम्पादन तथा कलर ग्रेडिङ गर्नेछन् भने छायांकन राजेश श्रेष्ठ, साउण्ड डिजाइन उत्तम न्यौपाने, ब्याकराउण्ड स्कोर शैलेश श्रेष्ठ, कस्ट्युम डिजाइन आशिष पौडेल, प्रोडक्सन डिजाइन कसम नेपाल, प्रोडक्सन कन्ट्रोल मनोज जोशी र प्रोडक्सन व्यवस्थापन विदुर मानन्धरले गर्नेछन्।
