बालगोपाल साहुखल एएफसी प्रो लाइसेन्स कोचिङ कोर्षका लागि अस्ट्रेलिया जाने भएका छन्।
कोर्ष पूरा गरेमा उनी यो योग्यता हासिल गर्ने पहिलो नेपाली नागरिक बन्नेछन्। यसअघि अमेरिका रहेका प्रदीप हुमागाइले प्रो लाइसेन्स प्रशिक्षक कोर्ष गरेका थिए।
अस्ट्रेलिया जानुअघि अखिल नेपाल फुटबल संघ (एन्फा) ले सातदोबाटोस्थित एन्फा कम्प्लेक्समा आयोजित एक कार्यक्रममा साहुखललाई हार्दिक बिदाइ तथा शुभकामना दिएको छ।
साहुखलको प्रो लाइसेन्स प्राप्त गर्ने यात्रा नेपाली फुटबलका लागि एउटा महत्त्वपूर्ण कोशेढुंगा हो। उनले यसअघि नेपाल यू-१९ महिला फुटबल टोलीको मुख्य प्रशिक्षकको रूपमा काम गरिसकेका छन्। च्यासल क्लब ए डिभिजनमा हुँदा प्रशिक्षकको भूमिका निर्वाह गरेका थिए। साथै, उनले ए डिभिजन लिगमा खेलाडीको रूपमा पनि खेलेका थिए।
एएफसीले पुरुष र महिला राष्ट्रिय टोलीका लागि प्रो लाइसेन्स प्राप्त प्रशिक्षक अनिवार्य गरेको छ, जसले गर्दा साहुखलको यो प्रयास नेपालमा फुटबलको भविष्यको विकासका लागि झनै महत्त्वपूर्ण बन्ने विश्वास छ
अस्ट्रेलिया जानुअघि साहुखलले भने, ‘प्रो लाइसेन्स गर्न जाँदा उत्साहित छु। यो मेरो र देशका लागि माइलस्टोन हो। कोर्ष गर्न धेरै प्रयास गरेको थिएँ र एन्फाबाट सहयोग भएको छ। यसमा मिहिनेत पनि धेरै नै गर्नु छ।'
फुटबल अस्ट्रेलियाद्वारा आयोजित यो कोर्ष सिड्नीमा एक वर्षभरि चार चरणमा सञ्चालन हुनेछ। पहिलो चरण सेप्टेम्बरमा तय गरिएको छ, त्यसपछि मार्च, जुलाई, र अन्तिम चरण २०२६ को अक्टोबरमा हुनेछ। कोर्ष पूरा गरेपछि साहुखलले कम्तीमा दुईदेखि तीन वर्ष आफ्नो देशको सेवा गर्ने प्रतिबद्धता व्यक्त गरेका छन्।
-1746009348.jpg)
