राष्ट्रिय महिला टोलीले एएफसी महिला एसिया कप अस्ट्रेलिया २०२६ छनोट र थाइल्यान्डसँगको दुई वटा मैत्रीपूर्ण खेलका लागि लागि बन्द शिविर सुरु गर्ने तयारी गरिरहेको छ।
त्यसका लागि अखिल नेपाल फुटबल संघ (एन्फा) ले मुख्य प्रशिक्षकमा राजेन्द्र तामाङलाई नै निरन्तरता दिएको छ।
एन्फाले विदेशी प्रशिक्षक भित्र्याउन सूचना निकाले पनि राजेन्द्र नै निरन्तरता पाउने भएका हुन्।
यस्तै भगवती थापा सहायक प्रशिक्षक, सुरज लामा गोलकिपर प्रशिक्षक, ब्रिन्दा देवान व्यवस्थापक र लक्ष्मी भट्टराई फिजियोमा नियुक्त भएका छन्।
छनोटको तयारीका लागि नेपालले थाइल्याण्डसँग दुई अन्तर्राष्ट्रिय मैत्रीपूर्ण खेल खेल्नेछ। पहिलो खेल जेठ १६ र दोस्रो खेल जेठ १९ गते हुनेछन्। दुवै खेल बैंककमा हुनेछन्।
त्यसपछि नेपालले उज्वेकिस्तानमा हुने छनोटमा प्रतिस्पर्धा गर्नेछ।
छनोटको समूह ‘एफ’मा नेपालले लाओस, श्रीलंका र उज्वेकिस्तानसँग प्रतिस्पर्धा गर्नेछ। नेपालले पहिलो खेल लाओससँग असार १५ गते, दोस्रो खेल श्रीलंकासँग असार १८ गते र अन्तिम खेल घरेलु टोली उज्वेकिस्तानसँग असार २१ मा खेल्नेछ।
समूहको विजेता मात्र एसिया कपमा छनोट हुनेछ।
