विराटनगरको सहिद रङ्गशालामा आजदेखि सञ्चालन भएको ‘विराट गोल्डकप’ फुटबल प्रतियोगिताअन्तर्गतको पहिलो खेलमा रिजालको मोरङ एफए विजयी भएको छ ।
विराट गोल्ड कप ट्रष्टद्वारा आयोजित रात्रिकालीन प्रतियोगितामा रिजालको एफएले भारतको कोलकात्ताको साउर्थन समिति एफसी लाई ३–२ गोलले पराजित गरेको हो ।
मोरङका लागिअभिषेक गुरुङले मध्यान्तर अगाडि पहिलो गोल गरे भने प्रतिउत्तरमा कोलकात्ताका सुदिप्ता हाल्डेनले १३ मिनेटमा गोलगरी खेल बराबरीमा पुर्याएका थिए ।
यसैगरी कोलकात्ताका अनिवेशले ३४ मिनेटमा गोल गरेका थिए भने मोरङका दोर्जे तामाङले ४६ मिनेटमा पेनाल्टीमार्फत गोलगरी खेललाई पुनः बराबरमा पुर्याएका थिए । खेल सकिन एक मिनेट बाँकी छदा मोरङका मौसमले लिम्बूले गोलगरी आफ्नो टिमलाई विजयी बनाई क्वाटर पुर्याउन सफल भएका छन् ।
खेलको ‘म्यान अफ दि म्याच’ मोरङ एफएका मौसम लिम्बू घोषित भई रु ११ हजार नगद प्राप्त गरेका छन् । भोलिको खेल गत वर्षको विजेता सशस्त्र प्रहरीको एपिएफ र भारत दिल्लीको सुदेभा दिल्ली एफसी बीच हुने ट्रष्टले जनाएको छ ।
प्रतियोगितामा भारतका दुई र नेपालका विभागीय टिमसहित १० टिम सहभागी छन् । प्रतियोगितको विजेतालाई नगद रु ११ लाख, उपविजेतालाई रु पाँच लाख, उत्कृष्ट प्रशिक्षक, उत्कृष्ट गोलरक्षक र सर्वाधिक गोलकर्तालाई जनही रु १५ हजार, दैनिक हुने खेलको उत्कृष्ट खेलाडीलाई रु ११ हजार र सर्वोत्कृष्ट खेलाडीलाई रु ५१ हजार नगद पुरस्कार दिइने आयोजकले जनाएको छ ।
नेपाली कांग्रेसका केन्द्रीय सदस्य डा शेखर कोइरालाले उक्त फुटबल प्रतियोगिताको उद्घाटन गर्नुभएको थियो ।
