नेपाली महिला राष्ट्रिय फुटबल टोलीले बुधबार आफ्नो १३ औं अन्तर्राष्ट्रिय फाइनल खेल्दैछ। त्रिपुरेश्वरस्थित दशरथ रंगशालामा नेपालले बलियो मानिएको म्यानमारसँग अन्तर्राष्ट्रिय महिला च्याम्पियसिपको उपाधिका लागि प्रतिस्पर्धा गर्न लागेको हो।
नेपाल र म्यानमारसहित लेबनान र किर्गिस्तान सहभागी प्रतियोगिता औपचारिक भने होइन। फिफा विन्डोजमा प्रतियोगिता भएकाले खेलहरूलाई अन्तर्राष्ट्रिय मान्यता भने हुनेछ।
लिग चरणमा नेपाल र म्यानमारले किर्गिस्तान र लेबनानलाई हराउँदा एकआपसमा भने बराबरी खेलेका थिए। आइतबार नेपाल र म्यानमबारले दुई दुई गोलको बराबरी खेलेका थिए। सो खेलमा नेपालले दुई पटक पछि परेको स्थिति उल्टाउँदा स्ट्राइकर सावित्रा भण्डारी 'साम्बा' ले उत्कृष्ट प्रदर्शन गरेकी थिइन्।
नेपाल र म्यानमार उपाधिका लागि भिड्न लागेको यो दोस्रो पटक हो। यसअघि नेपालले सन् २०१९ मा भारतमा भएको हिरो वुमन्स गोल्डकपको उपाधिका लागि म्यानमारसँग खेलेको थियो। तर उपाधि भिडन्तमा नेपाल ३-१ गोलले पराजित भएको थियो।
फाइनलअघि दुवै टोलीले उपाधिमा दाबेदारी प्रस्तुत गरेका छन्। नेपालभन्दा फिफा वरीयतामा ४८ स्थानमाथिको म्यानमारलाई नेपालले हराउन भने सहज छैन। लिग चरणमा म्यानमारले पहिलो रोजाइका केही खेलाडीलाई आराम दिएको थियो। यद्यपी म्यानमारका प्रशिक्षकले आफ्ना सबै खेलाडी उत्कृष्ट भएको प्रतिक्रिया दिएका थिए।
बुधबार साँझ ६ बजे फाइलनमा भिड्नुअघि नेपालका प्रशिक्षक राजेन्द्र तामाङले फाइनल जित्न राम्रो तयारी गरको दाबी गरेका छन्। नेपालकी कप्तान एन्जिला तुम्बापो सुब्बाले यसअघि रजतमा सीमित भएको इतिहास सम्झिँदै यसपटक उपाधिका लागि ‘फाइट’ गर्ने बताइन्।
बुधबार नेपालले १५ वर्षमा आफ्नो १३ औं फाइनल खेल्न लागेको हो।
नेपालले १२औं गत कात्तिकमा खलेको थियो। साफ महिला च्याम्पिनसिपको फाइनलमा दशरथ रंशगालामा नेपाल बंगलादेशसँग २-१ गोलले पराजित हुँदा लगातार १२ औं फाइनलमा पनि उपविजेतामै सीमित बनेको थियो। नेपाली नेपाली महिला फुटबलका लागि अन्तर्राष्ट्रिय फुटबलको फाइनल लगातार पीडादायी बनिरहेको छ। गत कात्तिमा कघरेलु दर्शक र सेमिफाइनलमा पाँच पटकको विजेता भारतविरूद्ध जित निकाल्दा आत्मविश्वासी देखिएको नेपाली टोली बंगलादेशविरूद्धको फाइनलमा सफल भने हुन सकेन।
गत फाइनलमा नियमित महिला लिग गर्न नहुँदा नेपाली महिला खेलाडीमा एक्सपोजरको कमी देखिएको थियो। साम्बा र रेखा पौडेल बाहेक अरू खेलाडीले उच्च स्तरको फुटबल खेलेका थिएनन्। केही खेलाडीले भारतीय लिग खेले पनि त्यसले साफको उपाधि जित्न पर्याप्त नभएको स्पष्ट देखिएको थियो।
कात्तिकमा बंगलादेशसँग फाइनल खेलेपछि नेपालमा महिला लिग आयोजना भएको थियो। एक महिनाभन्दा बढी लिग खेलेपछि नेपाली खेलाडीमा फिटनेसको समस्या केही हदसम्म समाधान भएको छ। जसले गर्दा आइतबार म्यानमारविरूद्ध नेपालले राम्रो खेल देखाएको थियो।
नेपालकी टोलीका प्रशिक्षक राजेन्द्र तामाङले पनि महिला लिगका कारण यसपटक खेलाडीको फिटनेसमा ध्यान दिन नपरेको बताएका थिए। उनले रणनीति सफल भए यसपटक उपाधि जित्न सहज हुने बताइरहेका छन्।
नेपाली टोलीका स्ट्राइकर साम्बाले म्यानमारविरूद्धको लिग चरणको अन्तिम खेलमा उत्कृष्ट प्रदर्शन गरेसँगै आफू लयमा फर्किएको बताएकी छन्। उनले फाइनल जित्ने विश्वास समेत गरेकी छन्।
यसअघि १२ फाइनलमा हार्दा नेपालले साफ च्याम्पियसिपको छ वटा फाइनल गुमाएको छ। २०२४ को साफको फाइनल गुमाएको नेपालले बंगलादेशसँग सन् २०२२ को संस्करणको फाइनलमा पनि ३-१ गोलको पराजय भोगेको थियो। नेपाल साफको उपाधि भिडन्तमा बंगलादेशसँग दुई पटक र भारतसँग चार पटक पराजित भइसकेको छ।
फाइनल पुग्नु नेपालका लागि कुनै नौलो होइन। नेपालका लागि अहिलेसम्म खड्किएको एउटै कुरा उपाधि नै हो। किनभने नेपाली महिला टिमले पछिल्लो १५ वर्षमा अन्तर्राष्ट्रिय फुटबलमा १२ पटक फाइनल खेले पनि अहिलेसम्म उपाधि जित्न सकेको छैन। जसका कारण नेपाली टोलीकी स्टार फर्वार्ड सावित्रा भण्डारी 'साम्बा' ले आफ्नो लक्ष्य साफको उपाधि जित्नु रहेको बताउँदै आएकी छन्।
साफ महिला च्याम्पियनसिपमा अन्तर्गत यसअघि सन् २०१०, २०१२, २०१४ र २०१९ फाइनलमा नेपालले भारतसँग हार बेहोरेको थियो। यस्तै २०२४ र २०२२ मा घरेलु मैदानमा भएको साफको फाइनलमा पनि नेपालले बंगलादेशसँग पराजय भोगेको थियो।
यस्तै नेपालले तीन पटकको दक्षिण एसियाली खेलकुद (साग) मा दोस्रो स्थानमै चित्त बुझाएको थियो। सन् २०१०, २०१६ र २०१९ को साग गेम्सको स्वर्ण भिडन्तमा नेपाल भारतसँग नै पराजित भएको थियो।
नेपालले २०१९ मा भारतमा भएको वुमन्स गोल्ड कपमा पनि फाइनलमा स्थान बनाएको थियो। तर नेपाली टिम उपाधि भिडन्तमा म्यानमारसँग पराजित हुन बाध्य भयो।
सन् २०१९ मै किर्गिस्तानमा भएको नाडेज्दा कपमा पनि नेपालले उपविजेतामै चित्त बुझाउन पर्यो। नेपाली टिम उज्वेकिस्तानसँग पराजित भएको थियो।
यस्तै गत वर्षको फागुनमा नेपालले वेस्ट एसियन फुटबल फेडेरेसन (वाफ) विमेन्स फुटबल प्रतियोगिताको फाइनलमा पुगेर एघारौं पटक उपाधि नजिक पुग्यो। उपाधि जोर्डनसँग फाइनल खेल्दा फेरि नेपाल अभागी सावित भयो। जोर्डनसँग नेपाल पेनाल्टी सुटआउटमा ५-३ ले पराजित भयो।
नेपाल फाइनल पुगेका प्रतियोगिता
साफ च्याम्पियनसिप - ६ पटक (२०१०, २०१२, २०१४, २०१९, २०२२ र २०२४)
साग गेम्स - ३ पटक (२०१०, २०१६ र २०१९)
नाडेज्दा कप - १ पटक (२०१९)
हिरो वुमन्स गोल्डकप - १ पटक (२०१९)
वाफ वुमन्स - १ पटक (२०२४)
इन्टरनेसनल वुमन्स च्याम्पियनसिप - १ पटक (२०२५)
