‘प्रथम जिसिडी कप–२०२५’ को उपाधि नख्खील गोर्खा फुटबल क्लबले जितेको छ। यो युएईमा नेपाली समुदायबाट आयोजित अहिलेसम्मकै ठूलो धनराशिको नेपाली फुटबल प्रतियोगिता भएको बताइएको छ।
जिसिडी रोयल गोर्खा फुटबल क्लबको आयोजनामा दुबईको दुलस्को क्याम्पको फुटबल मैदानमा भएको प्रतियोगिता फेब्रुअरी २२ देखि २३ सम्म चलेको थियो।
प्रतियोगिताको उपविजजेता न्यु ब्वाइज फुटबल क्लब तथा फेयर प्लेयर क्लवको उपाधि मेची महाकाली फुटबल क्लवले पाएको छ।
प्रतियोगितामा प्रथम हुने नख्खील गोर्खा फुटबल क्लबले ट्रफिसहित ८ हजार १ युएई दिराम पुरस्कार पाएको छ।
उपविजेता न्यु ब्वाइज फुटबल क्लबले ४ हजार १ युएई दिराम प्राप्त गरेको छ । प्रतियोगितामा १६ टिमको सहभागि रहेको थियो।
२ चरणमा सम्पन्न प्रतियोगिताको पहिलो चरणअन्तर्गत उदघाटन समारोह फेब्रुअरी २२ को बेलुका ९ बजे सुरु भएको थियो भने लगातार १५ घण्टासम्म चलेको प्रतियोगिता दोश्रो चरणको समापन समारोहसहित फेब्रुअरी २३ गते अपरान्ह सम्पन्न भएको थियो।
जिसिडी ग्रुपका उज्जल श्रेष्ठको सभापतित्व तथा दूतावासका लेवर काउन्सिलर दिपेन्द्र पौडेलको प्रमुख आतिथ्यतामा सम्पन्न उदघाटन समारोहमा दूतावासका श्रम सहचारी पंकजलाल कर्ण, गैरआवासिय नेपाली संघ युएईका अध्यक्ष विकास शाही, नेपाली जनसम्पर्क समिति युएईका सभापति भवानी प्रसाद तिमल्सिना, प्रवासी नेपाली मंच युएईका अध्यक्ष बाबुराम सापकोटा, नेपाली जन प्रगतिशील मञ्चका अध्यक्ष लक्ष्मण खनाल, एनआरएनका सचिव मनोज कुमार श्रेष्ठ, नेपाली काङ्ग्रेस महासमिति सदस्य दिनेश बहादुर गुरुङ, जनसम्पर्क समिति यूएईका संरक्षक तथा एनआरएनए आइसीसी सदस्य खेमलाल बस्नेत लगायतका व्यक्तित्वहरुको आतिथ्यता रहेको थियो।
खेलपछि आयोजित समापन समारोह जिसिडी ग्रुपका अध्यक्ष तथा गैरआवासिय नेपाली संघ मध्यपूर्व क्षेत्रीय उपसंयोजक रमेश श्रेष्ठको सभापतित्व तथा नेपाली कांग्रेसका प्रवक्ता तथा पूर्वमन्त्री डा. प्रकाशशरण महत प्रमुख अतिथि थिए।
प्रतियोगितामा सहभागी टिम, समर्थक तथा सहयोगी सबैप्रति आभार प्रकट गर्दै जिसिडी ग्रुपका अध्यक्ष रमेश श्रेष्ठले प्रवासमा रहेर पनि काम गर्ने शिलशिलामा आएका नेपालीहरुले आफ्नो खेलप्रति देखाएको माया र झुकावको खुलेरै प्रशंसा गर्दै यस्ता कार्यक्रमले प्रवासमा रहेका नेपालीहरुको मनोबल बढ्ने र आत्मियता बढने बताए।
