मिनान्नो राइजिङ भरतपुर गोल्डकपको उपाधि प्याराडाइज युथ क्लब रत्ननगरले जितेको छ।
शनिबार सम्पन्न फाइनल खेलमा बागमती युथ क्लब सर्लाहीलाई १-० ले हराउँदै प्याराडाइजले उपाधि चुमेको हो।
नेपाल प्रहरी शिक्षालय भरतपुर तालिम केन्द्रको मैदानमा भएको उपाधि भिडन्तमा प्याराडाइजलाई च्याम्पियन बनाउन मोहित गुरुङले निर्णायक गोल गरे। खेलको पहिलो हाफ गोलरहित बराबरीमा सकिएको थियो। दोस्रो हाफको १५ औं मिनेटमा मैदान प्रवेश गरेका मोहितले १६ औं मिनेटमा निर्णायक गोल गरे।
खेलको अन्त्यतिर बागमतीले राम्रो अवसरहरु बनाए पनि गोल गर्न सकेन। निर्णायक गोल गरेक मोहित प्लेयर अफ दि म्याच चुनिए। च्याम्पियन बनेको प्याराडाइजले ट्रफीसहित सात लाख रुपैयाँ प्राप्त गरेको छ । उपविजेतामा सीमित बागमतीले तीन लाख रुपैयाँ प्राप्त गरेको छ।
उपविजेता बागमतीका राज भुसाल प्लेयर अफ दि सिरिज भएका छन्। यस्तै प्याराडाइजका अभिषेक बराल उत्कृष्ट गोलरक्षक तथा प्याराडाइजकै जीवन गुरुङ उत्कृष्ट डिफेन्डर बने। उनीहरुले जनही १० हजार रुपैयाँ प्राप्त गरेको आयोजक चितवन ११ का अध्यक्ष सुशील कार्कीले जानकारी दिए ।
