साफ महिला च्याम्पियनसिप २०२४ अन्तर्गत नेपाल र भारतबीचको दोस्रो सेमिफाइनलको खेलमा नेपालकी फरवार्ड रेखा पौडेलले रातो कार्ड पाएकी छिन्।
खेलको ५०औं मिनेटमा रेखालाई रेफ्री ओम चोकीले दोस्रो पहेँलो कार्ड देखाएकी थिइन्। सहायक रेफ्री छोडेन छिरिङले रेखाले भारतकी चोन्कीलाई फल गरेको भन्दै झण्डा उठाएकी थिइन्। रेखाले चोन्कीसँग बलका लागि जुझेकी थिइन्। जससँगै दुवै खेलाडी लडेका थिए। जससँगै नेपाली खेलाडी र दर्शक आक्रोशित बनेका थिए। जसका कारण दश मिनेट खेल रोकिएको थियो।
रेखाले रातो कार्ड पाएपछि भारतले गोल गरेको थियो। सब्सिच्युट खेलाडी संगिताले गोल गरेकी थिइन्। त्यसपछि भारतले लामो समयसम्म सेलिब्रेसन गरेको थियो। रेफ्रीले खेलका लागि आग्रह गर्दा पनि भारतीय खेलाडी नआएपछि नेपालले बल चलाएको थियो। जसमा भारतीय खेलाडी तयार हुँदै नेपालकी प्रिति राईले बललाई जाली चुमाएकी थिइन्। जसका कारण भारतले चर्को विरोध गरेको थियो। यससँगै खेल फेरि रोकिएको छ।
खेलको पहिलो हाफ गोलरहित बराबरीमा सकियो।
त्रिपुरेश्वरस्थित दशरथ रंगशालामा भइरहेको खेलमा दुवै टोलीले पहिलो हाफमा पाएको अवसर सदुपयोग गर्न सकेनन्।
२०औं मिनेटमा भारतकी ज्योती चौहान सिक्स यार्ड बक्समा प्राप्त अवसरमा चुकिन्। अनमार्क रहेकी उनले हानेको प्रहार आकासिएको थियो।
३१ औं मिनेटमा नेपालले पनि पाएको अवसरलाई खेर फाल्यो। नेपालकी सावित्रा भण्डारी साम्बाले उत्कृष्ट रनिङमा हानेको प्रहारमा भारतकी गोलकिपर देवी वाङखेम बाधक बनिन्। क्लियर हुन नसकेको बलमा अमिषा कार्कीको प्रहारलाई पनि उनले विफल पारेकी थिइन्।
खेलमा नेपालकी साम्बा विपक्षी बक्समा छाए पनि फिनिसिङमा भने सफल भइरहेकी छैनन्।
यो खेलका लागि त्रिपुरेश्वरस्थित दशरथ रंगशालामा दर्शकको ओइरो लागेको छ। रंगशाला पूरा भरिएको छ। १४ हजार दर्शक क्षमताको रंगशालाका सबै टिकट बिक्री भइसकेको जनाइएको छ।
नेपाल र भारतबीच साफको सेमिफाइनलमा दोस्रो पटक प्रतिस्पर्धा भएको हो। सन् २०२२ मा दशरथ रंगशालामै भएको सेमिफाइनलमा नेपालले भारतलाई पराजित गरेको थियो। यद्यपि नेपाल फाइनलमा बंगलादेशसँग पराजित भएको थियो।
आजको खेलमा विजयी हुने टोलीले उपाधिका लागि बुधबार बंगलादेशसँग खेल्नेछ। आजै भएको पहिलो सेमिफाइनलमा बंगलादेशले भुटानलाई ७-१ ले हराएर दोस्रो पटक फाइनलमा स्थान पक्का गरेको थियो।
सबै तस्बिरः नवीनबाबु गुरूङ/ सेतोपाटी
-1730038509.jpg)
