भारत र पाकिस्तानबीचको क्रिकेट मैदानको तनाव अब अन्तर्राष्ट्रिय क्रिकेट काउन्सिल (आइसिसी) सम्म पुगेको छ।
भारतीय क्रिकेट कन्ट्रोल बोर्ड (बिसिसिआई) ले पाकिस्तानका खेलाडी हरिस रउफ र साहिबजादा फरहानविरुद्ध आइसिसीमा उजुरी दिएको छ। उनीहरूले एसिया कपको सुपर फोर खेलमा ‘अनावश्यक हाउभाउ’ देखाएको आरोप लगाइएको छ।
पाकिस्तान क्रिकेट बोर्ड (पिसिबी) ले पनि भारतीय कप्तान सूर्यकुमार यादवविरुद्ध आइसिसीमा उजुरी दिएको छ। सूर्यकुमारले एसिया कपमा पाकिस्तानविरुद्धको जित ‘पहलगाम आतंककारी हमलाका पीडितका परिवारहरूलाई’ समर्पित गरेपछि विवाद सुरु भएको हो। पाकिस्तानले सूर्यकुमारको टिप्पणीलाई ‘राजनीतिक’ भनेको छ।
भारत र पाकिस्तानबीचको खेल सधै तनावपूर्ण हुन्छन्। यसपालि पनि मैदानमा खेलाडीहरूबीच धेरै पटक चर्काचर्की भएको थियो।
समूह चरणको खेलअघि कप्तानहरूले हात पनि मिलाएनन्। खेलपछि खेलाडीहरूले एकअर्कालाई अभिवादन पनि गरेनन्।
एसिया कपमा यी दुई टोलीबीच दुई खेल भइसकेको छ। समूह चरणमा हात नमिलाएको घटनापछि गत आइतबारको सुपर फोर खेलमा खेलाडीहरूबीच चर्काचर्की र तनावपूर्ण क्षण देखिएको थियो।
पाकिस्तानका तीव्र गतिका बलर शाहीन शाह अफ्रिदी र हरिस रउफ तथा भारतका ओपनर अभिषेक शर्मा र शुभमन गिलबीचको भनाभन पनि समावेश थियो।
दुवै देशले एकअर्काविरुद्ध आइसिसीमा उजुरी दिएपछि अब आइसिसीले यस विषयमा छानबिन गर्नेछ।
-1746009348.jpg)
