नेपाल पुलिस क्लब प्रधानमन्त्री कप एकदिवसीय राष्ट्रिय क्रिकेट प्रतियोगिताको फाइनलमा पुगेको छ।
अन्तिम खेलमा त्रिभुवन आर्मी क्लबसँग भिड्नुअघि नै पुलिसले शीर्ष दुईमा स्थान पक्का गरेर फाइनलमा पनि प्रवेश गरेको हो।
लगातार आठौं जित निकालेर फाइनल पुग्ने क्रममा पुलिसले मंगलबार दाङको लमहीमा भएको खेलमा कर्णाली प्रदेशलाई ४४ रनले पराजित गर्यो। पुलिस १६ अंक सँगै शीर्ष स्थानमा छ। दोस्रो स्थानको ंआर्मीको १४ अंक छ।
पुलिसले दिएको १४८ रनको लक्ष्य पछ्याएको कर्णाली २४ ओभरमा १०३ रनमा अलआउट भयो। कर्णालीका लागि ओपनर रवीन्द्र शाहीले ४९ रन र अर्जुन घर्तीले ३० रन बनाए। अरु ब्याटरले दोहोरो अंकमा रन बनाउन सकेनन्।
कर्णालीलाई १०३ रनमै रोक्ने क्रममा पुलिसका ललित राजवंशीले अर्को खेलमा ६ विकेट लिए। उनले ९ ओभरमा ४१ रन खर्चिए। ललितले जारी प्रतियोगितामा पाँच खेलमा पाँच वा सोभन्दा बढी विकेट लिएका छन्। सर्वाधिक विकेट लिने बलरको शीर्ष स्थानमा रहेका ललितले ८ खेलबाट ३६ विकेट लिइसकेका छन्।
मंगलबार ललितबाहेक सागर ढकालले २ विकेट लिए भने करण केसीले १ विकेट आफ्नो नाममा लेखाए।
त्यसअघि टस जितेको कर्णालीले फिल्डिङ रोजेपछि पहिले ब्याटिङ गरेको पुलिस ४८ ओभरम १४७ रनमै अलआउट भयो।
खराब ब्याटिङ गरेको पुलिसका लागि अर्जुन साउदले ३६ रन र दिलिप नाथले ३४ रन जोडे। सागर ढकालले २८ बलमा नटआउट २२ रन जोड्दा पुलिसको स्कोर बढ्यो।
बलिङमा कर्णालीका अनुज चनराले ४ विकेट लिए भने दिवान पुनको नाममा ३ विकेट रह्यो।
यससँगै कर्णालीले सबै ९ खेल पूरा गर्यो। कर्णालीले ९ मध्ये ४ खेलमा जित र ५ खेलमा हार ब्यहोर्यो। हाल कर्णाली ९ खेलबाट ८ अंक जोड्दै पाँचौ स्थानमा छ।
-1742801159.jpg)
