प्रधानमन्त्री कप एकदिवसीय राष्ट्रिय क्रिकेट प्रतियोगितामा त्रिभुवन आर्मी क्लबले लगातार पाँचौ जित निकालेको छ।
आर्मीले सोमबार रुपन्देहीको एक्स्ट्राटेक ओभलमा खेलमा सशस्त्र प्रहरी बलको एपिएफ क्लबलाई ३ विकेटले पराजित गर्यो। एपिएफ भने पाँच मध्ये दुई खेलमा पराजित भइसकेको छ।
एपिएफले दिएको १४२ रनको लक्ष्य आर्मीले ४२.५ ओभरमा ७ विकेट गुमाएर पूरा गर्यो।
आर्मीका लागि कुशल मल्लले नटआउट ३१ रन र सोमपाल कामीले नटआउट २२ रनको योगदान गरे। दुईबीच आठौं विकेटका लागि नटआउट ५८ रनको साझेदारी हुँदा आर्मीको जित सम्भव भयो। आर्मीले ८७ रन जोड्दा ७ विकेट गुमाइसकेको स्थितिमा सोमपाल र कुशलले आर्मीलाई जिततर्फ अघि बढाएका थिए।
त्यसअघि आर्मीका लागि विवेक यादवले २६ रन बनाउँदा अरु ब्याटर सस्तैमा आउट भए।
बलिङमा एपिएफका कप्तान रोहित पौडेल, कमलसिंह ऐरी र अमरसिंह रटेउलाले २-२ विकेट लिए।
टस जितेको आर्मीले फिल्डिङ रोजेपछि पहिले ब्याटिङ गरेको एपिएफ ४२.३ ओभरमा १४१ रनमै अलआउट भयो। एपिएफका लागि सन्दीप जोराले ६५ रन बनाए। अरु ब्याटर सस्तैमा आउट भए।
बलिङमा आर्मीका आकाश चन्दले ४ विकेट लिए भने सोमपाल कामीले ३ विकेट हात पारे। शहाब आलमको नाममा २ विकेट रह्यो।
-1742801159.jpg)
