देब्रेहाते स्पिनरद्वय शाहब आलम र दिपेश कँडेलले तीन तीन विकेट लिएपछि सिवाइसी अत्तरियाले अर्जुन ट्रफी क्रिकेट प्रतियोगिताको उपाधि जितेको छ।
अत्तरियाले सोमबार कैलालीको धनगढीस्थित फाप्ला क्रिकेट मैदानमा भएको फाइनलमा फ्रेन्ड्स युथ क्लब डडेल्धुरालाई ३४ रनले हरायो।
अत्तरियाले दिएको ११९ रनको लक्ष्य पछ्याएको डडेल्धुरा १८ ओभरमा ८४ रनमै अलआउट भयो।
डडेल्धुराका लागि गजेन्द्र बोहराले २४ रन, कुशल भुर्तेलले २० रन र अशोक धामीले ११ रन जोड्दा अरु ब्याटरले दोहोरो अंकमा रन जोड्न सकेनन्।
डडेल्धुरालाई सस्तै समेट्ने क्रममा अत्तरियाका शाहब र दिपेशले तीन तीन विकेट लिए। शाहबले चार ओभरमा १ मेडन राख्दा ८ रन मात्र दिए। कँडेलले चार ओभरमा १४ रन खर्चिए। कमल गुप्ता र विवेक यादवले लिएको दुई दुई विकेट पनि अत्तरियाको जितमा महत्वपूर्ण सावित बन्यो।
त्यसअघि टस जितेर पहिले ब्याटिङ गरेको अत्तरियाले ९ विकेटको क्षतिमा ११८ रन मात्र बनाउन सफल भयो। अत्तरियाका लागि रशिद खानले सर्वाधिक ३१ रन बनाए। कप्तान सन्तोष कार्की र शंकर रानाले २०-२० रन बनाउन सफल भए।
बलिङमा डडेल्धुराका अभिशेक गौतमले ४ विकेट लिन सफल भए।
