प्रधानमन्त्री कप काठमाडौं जिल्ला छनोट क्रिकेट प्रतियोगितामा ग्रेट हिमालयन क्रिकेट एकेडेमीले लगातार दोस्रो खेलमा जित निकालेको छ।
हिमालयनले आइतबार माथिल्लो मुलपानी मैदानमा भएको खेलमा एन्जल्स स्पोर्ट्स एकेडेमीलाई ६४ रनले पराजित गर्यो।
पहिले ब्याटिङ गरेको ग्रेट हिमालयनले ८ विकेटको क्षतिमा ११२ रन जोड्यो।
उसका लागि इशान पाण्डेले २५ बलमा ३१ रन बनाए भने सन्जन बैठाले २२ रन को योगदान गरे।
बलिङमा एन्जल्सका उपेन्द्र खत्री र सुजन दाहालले २-२ विकेट लिए।
११३ रनको लक्ष्य पछ्याएको एन्जल्स ४८ रनमै अलआउट भयो। उसका लागि लक्ष्मण कुँवरले सर्वाधिक १० रन जोड्दा अरु ब्याटर सस्तैमा आउट भए।
बलिङमा ग्रेट हिमालयनका सबल अधिकारी र दर्शिल विष्टले ३-३ विकेट लिए। इशान पाण्डेले २ विकेट हात पार्न सफल भए। पाण्डे खेलको प्लेयर अफ दि म्याच घोषित भए।
त्यसअघि दिनको पहिलो खेलमा हिमालयन क्रिकेट एकेडेमी ‘ए’ ले बालुवाटार क्रिकेट क्लबलाई ९ रनले पराजित गरेको थियो।
