आठौं राष्ट्रिय खेलकुद प्रतियोगिता अन्तरगत दाङको लमहीमा सोमबारदेखि सेमिफाइनलका खेल हुने भएको छ।
फाइनलमा पुग्न एपिएफ र प्रदेश नम्बर २, प्रदेश नम्बर १ र सुदूरपश्चिम प्रदेशका बीचमा सेमिफाइनल खेल हुनेछ। पहिलो खेल एपिएफ, प्रदेश नम्बर २ र दोस्रो खेल प्रदेश नम्बर १ र सुदूरपश्चिमका बीचमा हुनेछ।
प्रदेश ३ लाई हराउँदै आइतबार सुदूरपश्चिम सेमिफाइनलमा प्रवेश गरेको हो।
टस जितेर व्याटिङ गरेको सुदूरपश्चिम प्रदेशले निर्धारित ओभरमा ५ विकेट गुमाएर १२७ रन बनाएको थियो ।
सुदुरपश्चिम प्रदेशकी कविता जोशीले अर्धशतक बनाइन् । १२८ रनको लक्ष्य लिएर मैदानमा उत्रिएको प्रदेश नम्बर ३ सबै विकेट गुमाएर १८ ओभरमा जम्मा १०८ रन बनाउन सक्यो ।
महिला क्रिकेट प्रतियोगितामा एउटा बिभागिय टिमसहित कर्णाली प्रदेश बाहेक ६ ओटा प्रदेश गरि ७ टिमले भाग लिएका थिए । फाइनल प्रवेशका लागि सोमबार दुवै सेमिफाइनल खेल हुने छन् । विहान हुने पहिलो खेलमा एपिएफ र प्रदेश २ तथा प्रदेश १ र सुदूरपश्चिम प्रदेश भिड्ने छन् ।