जेनजी प्रदर्शन क्रममा जलाइएको भाटभटेनी भित्र भेटिएका ६ वटा शवको पहिचान अझै हुन सकेको छैन।
भदौ २४ गते भएको प्रदर्शन क्रममा जलाइएको काठमाडौंको चुच्चेपाटीस्थित भाटभटेनीबाट भदौ २९ गते ६ वटा शव फेला परेका थिए। मांशपेसी जलेर कंकाल मात्रै बाँकी रहेको अवस्थामा भेटिएको शव त्यसयता त्रिवि शिक्षण अस्पताल महाराजगन्जमा राखिएको छ।
शव पहिचानका लागि भनेर प्रहरीले त्रिवि शिक्षण अस्पतालको फरेन्सिक विभागमा पठाएको थियो। तर अहिलेसम्म पहिचान हुन नसकेको फरेन्सिक विभाग प्रमुख डा. गोपाल चौधरीले जानकारी दिए।
'पहिचान गर्न अफ्ठ्यारो छ। डिएनए परीक्षणका लागि काठमाडौंको सामाखुसीस्थित नेपाल प्रहरीको केन्द्रीय विधि विज्ञान प्रयोगशालामा पठाएका छौं,' उनले भने, 'हाम्रो अनुभवमा उहाँहरूको पहिचान खुल्न सक्ने देखिँदैन।'
उनका अनुसार डिएनए परीक्षणका लागि जीवित सेलहरू आवश्यक हुन्छ।
तर शरीर पूर्ण रूपमा जलेर कंकाल मात्रै बाँकी भएकाले त्यसबाट थाहा हुन मुस्किल हुने प्रहरीको केन्द्रीय प्रवक्ता प्रहरी नायव महानिरीक्षक (डिआइजी) विनोद घिमिरेले जानकारी दिए।
'विधि विज्ञानमा आएको वा नआएको भए पनि डिएनए परीक्षणका लागि मानिसको जीवित सेल आवश्यक पर्ने चिकित्सहरूले बताएका छन्। तर शरीर पूर्ण रूपमा जलेका छन्,' उनले भने, 'तै पनि विधि विज्ञानले प्रयास गरिरहेको छ, प्रक्रियामै छ।'
जिल्ला प्रहरी परिसर काठमाडौंका एसपी पवन भट्टराईले पनि शव दाबी गर्न आए पनि तत्काल दिनसक्ने अवस्था नरहेको बताए।
'जेन-जी आन्दोलनमा गएको थियो। फर्किएन भन्नेखालको पीडित परिवार त कोही आउनु भएको छैन। तर एक-दुई दिन अघिदेखि सम्पर्कमा छैनन्, हरायो भनेर केही परिवार प्रहरीको सम्पर्कमा आइरहनुभएको छ,' एसपी भट्टराईले भने, 'कतिपय रेकर्ड फाइलहरू जलेकाले विवरणहरू समेट्ने काम भइरहेको छ।'
1635339834.jpeg)
-1746009348.jpg)
