जेनजी आन्दोलन क्रममा काठमाडौं उपत्यकाका साना–ठूला धेरै प्रहरी चौकी/वृत्तमा तोडफोड र आगजनी भयो।
कुनै कुनै वृत्त आन्दोलनकारीको निसानामा परेनन्। केहीमा भने तोडफोड गर्ने प्रयास भए पनि प्रहरीले निकै मेहनतले जोगाए।
यस्तै जोगिएकामध्ये एक हो हाडीगाउँस्थित मालीगाउँ प्रहरी वृत्त।
भदौ २४ गते अधिकांश प्रहरी चौकीमा आक्रमण भयो। मालीगाउँ चौकी पनि अछुतो रहेन।
यहाँका तत्कालीन प्रहरी डिएसपी सुनीलजंग शाहका अनुसार त्यस दिन चौकीमा तीन पटक हमला भएको थियो। प्रहरीले डटेर प्रदर्शनकारीको सामना गरेर चौकी जोगाउन सफल भए।
'हामीले सुरक्षा बलका सबै सिद्धान्त प्रयोग गर्यौं,' शाहले त्यस दिनको घटना सम्झिँदै भने, 'सुरूमा हामीले माइकिङ गरेर चौकीमा क्षति नगर्न आग्रह गर्यौं। तर प्रदर्शनकारीहरू उग्र र आक्रमक थिए। उनीहरूले नमानेपछि हामीले लाठीचार्ज गर्यौं। अश्रु ग्यास हान्यौं। हवाइफायर पनि गर्यौं। त्यतिले पनि नभएपछि रबरको गोली हान्यौं।'
उनका अनुसार प्रदर्शनकारीहरू पहिलो पटक दिउँसो १–२ बजेतिर चौकी आक्रमण गर्न आइपुगेका थिए।
उनीहरू ठूलो संख्यामा थिए। शाहको अनुमानमा एक हजारदेखि १२ सय जना हाराहारी थिए।
मालीगाउँ वृत्तमा १२४ जना प्रहरीको दरबन्दी छ। तर त्यस दिन उनीहरू सबै चौकीमा थिएनन्। उनीहरूलाई विभिन्न ठाउँमा खटाइएको थियो। कोही बालुवाटार पुगेका थिए, कोही बानेश्वर।
मालीगाउँमा करिब ५० जना प्रहरी थिए।
संख्या थोरै भए पनि सुरूदेखि नै सुरक्षा प्रावधान र राम्रो रणनीति अपनाएर उनीहरूले प्रदर्शनकारीको ठूलो भीड तितरबितर बनाए।
डिएसपी शाहका अनुसार गहनापोखरी र कालोपुलमा आगजनी गरेर आएका दुई समूह आपसमा जोडिएर दोस्रो पटक चौकी आक्रमण गर्न खोजे।
यो संख्या पहिलेको भन्दा ठूलो थियो। उनीहरूलाई पनि त्यही सुरक्षा बलका सिद्धान्त प्रयोग गरेर चौकीबाट भगाइयो।
करिब साढे ५ बजेतिर चौकीमा फेरि आक्रमण भयो।
तेस्रो पटक आएको यो भीड झन् उग्र थियो। विभिन्न चौकी अनि सरकारी भवनहरू जलाएका प्रदर्शनकारीहरू एकजुट भएर मालीगाउँ वृत्त पुगेका थिए।
'उनीहरू करिब तीन हजार हाराहारी थिए,' शाहले भने।
यो उग्र भीड थामिने मनसायमा थिएन। वृत्तको मूलगेट भत्काएर भित्र प्रवेश गर्न थाल्यो।
तैपनि वृत्तका ५० जना प्रहरीले हार मानेनन्। उनीहरू लडिरहे।
'तेस्रो पटक आक्रमण हुँदा पनि हामीले हार मानेनौं। पहिले जस्तै डटेर लाग्यौं। सबै सुरक्षा उपाय अपनायौं र चौकी जोगाउन सफल भयौं,' शाहले भने।
उनका अनुसार प्रदर्शनकारीले ढुंगामुढा गर्दा प्रहरीहरूलाई चोटपटक लाग्यो। यसका बाबजुद उनीहरू लडिरहे।
'हामीलाई जसरी पनि चौकी जोगाउनुपर्छ भन्ने थियो। राम्रो नेतृत्व र सामूहिक कामले गर्दा हामीले हाम्रो चौकी जोगाउन सफल भयौं,' उनले भने।
डिएसपी शाह हाल मालीगाउँ वृत्तबाट सरूवा भएर हनुमानढोका प्रहरीमा छन्।
मालीगाउँ प्रहरी वृत्तका तत्कालीन डिएसपी सुनीलजंग शाहको बिदाइ क्रममा। तस्बिर सौजन्यः डिएसपी सुनीलजंग शाहको फेसबुक
-1746009348.jpg)
