अमेरिकाबाट डिपोर्ट गरेर काठमाडौं पठाइएका नेपालीहरूले जहाजभित्र २४ घन्टासम्म हातमा हतकडी र खुट्टामा नेल लगाएर राखिएको बताएका छन्।
त्रिभुवन अन्तर्राष्ट्रिय विमानस्थलमा अवतरण गरेपछि जहाजभित्रै हतकडी र नेल खोलिएको उनीहरूको भनाइ छ।
बुधबार बिहान काठमाडौं आइपुगेका नेपालीहरूले प्रहरीलाई बयान दिने क्रममा यो जानकारी दिएका हुन्।
अमेरिकाले डिपोर्ट गरेका ९ जना नेपाली बुधबार बिहान काठमाडौं आइपुगेका थिए। तीमध्ये ८ जना ग्रिफान एयरको चार्टरबाट आएका हुन् भने एक जना व्यावसायिक उडानबाट आइपुगेका हुन्। तिनमा ७ पुरूष र २ जना महिला छन्।
'चार्टर गरेर ल्याइएका ८ जनाले यात्राभरि हातमा हतकडी र खुट्टामा नेल लगाएर राखिएको भनेका छन्। काठमाडौं अवतरण भएपछि जहाजभित्रै हतकडी खोलिएको उनीहरूको बयान छ,' नेपाल प्रहरीको मानव बेचबिखन अनुसन्धान ब्युरोका प्रवक्ता एसपी नरेन्द्र कुँवरले भने।
'उनीहरूले चौबीस घन्टासम्म हतकडी र नेल लगाएको भनेका छन्,' उनले भने, 'कमर्सियल फ्लाइटबाट आउनेले भने नलगाएको बयान दिएका छन्।'
त्रिभुवन विमानस्थलमा ओरालिएपछि अध्यागमन विभागले प्रक्रिया पूरा गरेर उनीहरूलाई मानव बेचबिखन अनुसन्धान ब्युरोको जिम्मा लगाएको थियो। ब्युरोले उनीहरू कसरी अमेरिका पुगे, त्यहाँ पुगेपछि के-के भयो र कसरी नेपाल फर्काइयो भन्ने विषयमा प्रश्न सोधेको थियो।
आफै स्वदेश फर्किन तयार भएकालाई नियमित फ्लाइटमा पठाइएको र फर्किन नमान्नेलाई हतकडी र नेल लगाएर चार्टर्ड विमानमा ल्याइदिएको प्रहरीले जनाएको छ।
'अमेरिकाले अध्यागमन कानुन उल्लंघन गरेकै कारण थुनामा राखिएका नेपालीलाई फर्काएको भनिएको छ,' एसपी कुँवरले भने, '५/६ महिना त्यहाँ थुनामा बसेकाहरूलाई फर्काइएको हो।'
यसरी फर्काइएकामध्ये डोटीका एक जना, दाङका तीन, रूकुम पूर्वका दुई, रूकुम पश्चिमका दुई र रोल्पाका एक जना छन्। उनीहरू कहिले र कति खर्च गरेर अमेरिका गएका थिए भनेर हामीले प्रहरीलाई सोधेका छौं।
कहिले कति खर्च गरेर अमेरिका पुगे?
डोटीबाट अमेरिका पुगेकी महिला सन् २०२४ फ्रेबुअरी ४ मा यहाँबाट निस्केकी थिइन्। उनी सेप्टेम्बरमा अमेरिका पुगिन्। उनले दुबई, ब्राजिल, मेक्सिको हुँदै अमेरिका पुगेको बताएकी छन्। उनले त्यहाँ पुग्न ७० लाख रूपैयाँ खर्चेकी थिइन्।
त्यस्तै, दाङका तीनमध्ये एक जना २०२४ जनवरी २१ मा नेपालबाट निस्केका थिए। उनी अक्टोबर १५ मा त्यहाँ पुगे। अमेरिका पुग्दासम्म उनको ५० लाख रूपैयाँ खर्च भएको थियो।
दाङकै अर्का व्यक्ति २०२४ अप्रिल २१ मा उडेका थिए भने अगष्ट १९ मा अमेरिका छिरेका थिए। उनले त्यहाँ पुग्न ५२ लाख रूपैयाँ खर्च गरेका छन्।
दाङका तेस्रो व्यक्ति २०२४ मे ३० मा उडेर सेप्टेम्बर २५ मा पुगेका छन्। उनको कुल खर्च ४५ लाख रूपैयाँ भएको थियो।
रुकुम पश्चिमका दुई जनामध्ये एक जना २०२४ मे १६ मा निस्किएर सेप्टेम्बर २५ मा पुगेका थिए। उनको ६० लाख खर्च भयो। त्यस्तै, रूकुम पश्चिमका अर्का व्यक्ति २०२४ फेब्रुअरी १० मा निस्किएर सेप्टेम्बर २८ मा अमेरिका पुगे। उनले पनि अमेरिका पुग्न ६० लाख रूपैयाँ खर्चिएका बताएका छन्।
रूकुम पूर्वका दुई जनामध्ये एक जनाले सन् २०२३ डिसेम्बर २१ मा नेपाल छाडेका थिए। उनी २०२४ जुलाई १५ मा अमेरिका पुगे। यसबीच उनको ६५ लाख रूपैयाँ खर्च भयो।
रूकुम पूर्वका अर्का व्यक्ति सन् २०२४ जनवरी १३ मा निस्केर सेप्टेम्बर २८ मा अमेरिका पुगे। उनले ५५ लाख रूपैयाँ खर्च भएको बताएका छन्।
रोल्पाका एक जना व्यक्ति २०२४ मार्च १२ मा गएका थिए। उनी जुन १५ मा पुगे। उनले पनि ४० लाख रूपैयाँ खर्च भएको प्रहरीलाई बताएका छन्।
उनीहरूलाई अमेरिका प्रवेश गरेदेखि नै नियन्त्रणमा लिइएको प्रारम्भिक अनुसन्धानमा खुलेको छ। उनीहरू सबै तल्लो बाटो हुँदै अमेरिका पुगेका हुन्। प्राय:को रूट दुबई- स्पेन-ब्राजिल- मेक्सिको थियो।
उनीहरूले प्रहरीलाई भनेअनुसार ५-६ महिना लामो यात्रा गरेर अमेरिका पुगेको देखिन्छ। उनीहरूले कसको सहयोमा गएको भन्नेबारे खुलाएका छैनन्। कानुनी प्रक्रियामा पनि नजाने बताएका छन्।
'उहाँहरूले कुनै समस्या छैन भनेपछि परिवारको जिम्मा लगाएर पठाइदिएका छौं,' एसपी कुँवरले भने।
ब्युरोको तथ्यांकअनुसार डोनाल्ड ट्रम्प अमेरिकी राष्ट्रपति भएयता ३५ जना नेपालीलाई फर्काइएको छ। तीमध्ये पाँच जना महिला र ३० जना पुरूष छन्।
अमेरिकाले २०७५ देखि हालसम्म २६२ जनालाई फर्काएको छ। त्यसमा १० जना महिला र २५२ जना पुरूष छन्।
