काठमाडौंमै दुई वर्षअघि गार्मेन्ट व्यवसायी लाल मोहम्मदको हत्या भएको घटनामा संलग्न भारतीय सार्प सुटरलाई प्रहरीले पक्राउ गरेको छ।
आइतबार काठमाडौं उपत्यका अपराध अनुसन्धान कार्यालयको टोलीले भारतीय सार्प सुटर गुड्डु पटेललाई टोखाबाट पक्राउ गरेको हो। उनलाई पक्राउ गर्न प्रहरीले तीन राउन्ड गोली चलाएको थियो।
कार्यालयका प्रवक्ता एसपी काजीकुमार आचार्य गोठाटार घटनामा संलग्न रही यसअघि पक्राउ परेका चार जनासँग सोधपुछ र आन्तरिक अनुसन्धानबाट गोली हान्ने गुड्डु पटेल रहेको निष्कर्षमा प्रहरी पुगेको थियो।
त्यतिबेलादेखि नै उनको 'मुभमेन्ट' निगरानी गरिरहेका थियौं। उनी बीच-बीचमा काठमाडौं आउजाउ गरिरहेको सूचना पनि प्रहरीसँग थियो। यद्यपि ट्र्याक गर्न सकिरहेको थिएनौं।
केही दिनदेखि गुड्डु काठमाडौंमै छन् भनेर प्रहरीले सूचना पाएको थियो।
'सुरूमा माछापोखरी क्षेत्रमा रहेको भन्ने सूचना थियो,' एसपी आचार्यले भने, 'प्राविधिक निगरानी गर्ने क्रममा लोकेशन ट्र्याक भयो र उनी टोखामा रहेको खुल्यो।'
एसपी आचार्यका अनुसार गुड्डुले ह्वाट्सएप चलाएपछि उनको लोकेशन ट्र्याक भएको थियो। लोकेसन पच्छ्याउँदै सादा पोशाकमा रहेका प्रहरी टोखाबाट झोर जाने बाटो नजिक गुड्डु भएको ठाउँमा पुगेको थियो।
'प्रहरी हो भन्ने निश्चित भएपछि आरोपी भाग्न खोजे। प्रहरीले नभाग्न चेतावनीस्वरूप दुई राउन्ड हवाइ फायर गर्यो। त्यसपछि थप एक राउन्ड गोली प्रहार गरेको हो। उनको खुट्टामा गोली लागेको थियो,' एसपी आचार्यले भने।
गोली लागेर घाइते भएका उनलाई ट्रमा सेन्टरमा उपचार भइरहेको छ। उपचारपछि थप अनुसन्धान हुने एसपी आचार्यले जानकारी दिए।
'कहिलेदेखि आएर बसेका हुन्। को-को आएका छन्। के गर्न आएका हुन् भन्ने सोधपुछपछि खुल्ला। अहिले उपचार भइरहेको छ,' उनले भने।
घटना के हो?
२०७९ को असोज ३ गते कागेश्वरी मनोहरा नगरपालिका वडा नम्बर ८ स्थित गोठाटारमा पेस्तोलसहित आएका अज्ञात व्यक्तिले मोहम्मदलाई लखेटी-लेखेटी गोली हानेका थिए।
गाडीबाट बाहिर निस्किएलगत्तै उनलाई पछाडिबाट एक व्यक्तिले गोली हानेका थिए।
गोली प्रहार हुन थालेपछि मोहम्मद जोगिन प्रयास गरिरहेका थिए। उनी बा ६ च ५१५२ नम्बरको गाडीलाई एक चक्कर लगाएपछि ढलेका थिए।
चार राउन्ड गोली प्रहार हुँदा उनको टाउको, कोखा र तिघ्रामा लाग्यो। गोली प्रहारबाट गम्भीर घाइते भएका उनी सडकमै ढले।
आफ्ना बुवा घर अगाडि सडकमा गोली हानेको देखेपछि उनकी छोरी एक तलामाथिबाट हामफालेकी थिइन्। उनी तल झरेपछि मोहम्मदमाथि गोली प्रहार गर्ने व्यक्ति मोटरसाइकल चढेर भागेका थिए। छोरीले गोली चलाउने समूहलाई लखेट्दै केही परसम्म पुगिन्। तर मोटरसाइकल चढेर उनीहरू भागे।
साँझपख घटना भए पनि त्यहाँ तत्काल छरछिमेकी जम्मा भएनन्। कसैको सहयोग पाएको भए गोली चलाउने व्यक्ति घटनालगत्तै पक्राउ पर्ने थिए।
गोली लागेर गम्भीर घाइते भएका मोहम्मदलाई उपचारको लागि नजिकैको शंकरापुर अस्पताल लगिएको थियो। त्यहाँ उपचार सम्भव नभएपछि थप उपचारका लागि उनलाई महाराजगन्जस्थित त्रिवि शिक्षण अस्पताल लगे पनि चिकित्सकहरूले मृत घोषणा गरेका थिए।
घटनास्थलमा बन्दुक र गोलीका चार वटा खोका भेटेको थियो। सर्लाहीको हरिवन नगरपालिका–२ का ५५ वर्षीय मोहम्मद गार्मेन्ट व्यवसायी थिए।
२०६४ साल असार २० गते बलराम पटुवा नाम गरेका एक व्यक्तिको काठमाडौंको अनामनगरस्थित धोबीखोलामा गोली प्रहारबाट हत्या भएको थियो।
उक्त हत्या आरोपमा लाल मोहम्मद पक्राउ परेका थिए। यस घटनामा अरू पनि पक्राउ परेका थिए। हत्या आरोपमा पक्राउ परेका मोहम्मद १० वर्ष जेल सजाय भोगेर पाँच वर्षअघि छुटेका थिए।
त्यसयता उनी गार्मेन्टको व्यवसाय गरिरहेका छन्। त्यतिबेला मोहम्मद नक्कली भारतीय नोटको कारोबार गर्ने गिरोहमा सामेल थिए। उनी त्यसबेला अर्का कारोबारी इल्ताफ हुसेन अन्सारीसँग काम गर्थे।
अन्सारी पछिल्लो समय २०७७ सालमा काठमाडौंमा भेटिएको साढे १४ किलो नक्कली सुन प्रकरणमा मुछिएका थिए। त्यतिबेला उनको साथबाट आधा किलो सुन पनि बरामद भएको थियो। बाँकी चाँदीमा सुनको जलप लगाएको अवस्थामा फेला परेको थियो।
उनीहरूकै समूहले बलराम पटुवाको हत्या गरेको खुलेको थियो।
त्यो घटना हुनुअघि नक्कली नोटको कारोबार युनुस अन्सारीले गर्थे। उनी २०६५ सालमा पक्राउ परेका थिए।
केन्द्रीय कारागारमा रहेका उनलाई २०६७ सालमा कारागार भित्रै गोली हानेर हत्या गर्ने प्रयास भएको थियो। तर उक्त घटनामा उनी बचेका थिए। उनको कुममा गोली लागेको थियो। गोली हानेको आरोपमा प्रहरीले मञ्जित सिंहलाई पक्राउ गरेको थियो।
यसैगरी २०६६ साल माघ २४ मा स्पेसटाइम नेटवर्क तथा च्यानल नेपाल लिभिजनका प्रमुख जमिम शाहको हत्या भयो। लाजिम्पाटको फ्रान्सेली दूतावासअगाडि सडकमा भारतीय समूहले गोली हानेर उनको हत्या गरेको थियो। उनी पनि नक्कली नोटकै कारोबारमा संलग्न भएकाले मारिएको प्रहरी अधिकारीको भनाइ छ।
त्यसैगरी २०६८ असोज ९ मा इस्लामिक संघका महासचिव फैजान अहमदको पनि हत्या भएको थियो। उनको पनि घन्टाघर क्षेत्रमा हत्या भएको थियो।
उनीहरू सबैको हत्या हुनुको एउटै कारण नक्कली नोटको कारोबार भएको सिआइबीका एक अधिकारीले बताए।
मोहम्मदको हत्या पनि त्यसैको सिलसिला रहेको प्रहरी अधिकारीहरूले त्यतिबेला बताएका थिए।
‘युनुस अन्सारीलाई गोली हानेको घटना, टेलिभिजन सञ्चालक जमिम शाह, फैजानको घटनाहरू लगायत छन्। यी सबै एकअर्कासँग सम्बन्धित छन्,’ ती सिआईबीका उच्च अधिकारीले त्यतिबेला भनेका थिए, ‘पात्र पनि सम्बन्धित नै छन्। घटनाहरू पनि सम्बन्धित नै छन्। अन्त्यमा यो जोडिने नक्कली नोटको कारोबारसँगै हो।'
घटनामा संलग्न चार जना यसअघि नै पक्राउ परिसकेका छन्।
बब्लु पासवान भनिने गणेश पासवान गत वैशाख १६ गते वीरगन्ज महानगरपालिका-१६ भुटनदेवीबाट पक्राउ परेका थिए।
उनलाई पनि प्रहरीले गोली हानेर पक्राउ गरेको थियो। चेकिङमा परेपछि भाग्न खोजेका उनलाई प्रहरीले गोली हानेको थियो।
त्यसअघि ०७९ कै असोज १४ गते तीन जना पक्राउ परेका थिए।
वीरगन्ज महानगरपालिका-१६ बस्ने २१ वर्षीय महोरम मियाँ, वीरगन्ज-१५ का १९ वर्षीय रेहान मियाँ र मकवानपुर बकैया गाउँपालिका-१ घर भई काठमाडौंको कपन फैकाचोक बस्ने २१ वर्षीया सुमी भन्ने सुस्मिता स्याङताङ पक्राउ परेका थिए।
