कास्की– २ मा प्रतिनिधिसभा निर्वाचनको मतगणना सुरू भएको छ।
सर्वदलीय बैठक सकिएलगत्तै मतगणना सुरू गरिएको निर्वाचन अधिकृतको कार्यालयले जनाएको छ।
पोखरा महानगरपालिकाका ११ वटा वडा पर्ने यस क्षेत्रको मतगणना सिँचाइ तथा जलस्रोत कार्यालयमा गरिएको छ।
मुख्य निर्वाचन अधिकृतको कार्यालयका अनुसार कास्की– १ र ३ को मतगणना सुरू गर्ने तयारी गरिएको छ। कास्की– १ मा सर्वदलीय बैठक सकेर मतगणनाको तयारी भइरहेको छ भने कास्की– ३ मा बैठक चलिरहेको जनाएको छ।
मुख्य निर्वाचन अधिकृत हिमलाल बेलबासेले २४ घण्टाभित्र प्रत्यक्षतर्फको मतगणना सक्ने गरी तयारी गरेको बताएका छन्। प्रत्यक्षतर्फको मतगणना सकिएपछि समानुपातिक मतगणना गर्ने सर्वदलीय सहमति भएको बेलबासेले जानकारी दिए।
तीन वटा निर्वाचन क्षेत्र रहेको कास्कीमा १ लाख ३०५ जना महिला, ८८ हजार ९५९ पुरूष र ३ जना अन्य गरी १ लाख ८९ हजार २६७ जना मतदाताले मतदान गरेका थिए।
कुल मतदाताको ६१.३४ प्रतिशत मत खसेको निर्वाचन कार्यालयले जनाएको छ।
