मधेस प्रदेशका नवनियुक्त मुख्यमन्त्री सरोजकुमार यादवले पदभार ग्रहण गरेका छन्।
असहज परिस्थितिका बाबजुद उनले मधेस भवन छिरेर मंगलबार पदभार ग्रहण गरेका हुन्।
आइतबारकै मितिमा मुख्यमन्त्री नियुक्त भए पनि परिस्थिति प्रतिकूल हुँदा उनले सोमबार पद भार ग्रहण गर्न पाएका थिएनन्।
मुख्यमन्त्री यादवले मुख्यमन्त्री तथा मन्त्रिपरिषदको कार्यालयमा पदभार ग्रहण गरेको कार्यालयका उपसचिव सूचना अधिकारी बासुदेव मल्लले जानकारी दिए।
‘यसअघि प्रमुख सचिवज्यू बस्दै आउनुभएको कार्यकक्षलाई आवश्यक व्यवस्थापन गरेर मुख्यमन्त्री ज्यूको कार्यकक्षको रूपमा तयार गरेका थियौं,’ उनले भने, ‘त्यसैमा साँझ मुख्यमन्त्री ज्यूले पदभार ग्रहण गर्नुभयो।’
सोही कोठामा पसेर सोमबार विपक्षी कांग्रेस लगायत ७ दलका प्रदेश सभा सदस्यहरूले तोडफोड गर्नुको साथै कर्मचारी माथि हातपात गरेका थिए। सोही कोठामा सरसफाइ गर्नुका साथै आवश्यक प्रबन्ध मिलाएर मुख्यमन्त्रीको कार्यकक्ष बनाइएको उपसचिव मल्ल बताउँछन्।
यादवले पदभार ग्रहण गरेको विरोधमा सात राजनीतिक दलका सांसद तथा नेता कार्यकर्ताहरूले मधेस भवन अगाडि नाराबाजी गरेका छन्। उनीहरूले टायर बालेर विरोध प्रदर्शन समेत गरेका थिए।
विरोध प्रदर्शनका क्रममा मधेस भवन बाहिर सांसद र राजनीतिक दलका नेता कार्यकर्ता र प्रहरीबीच झडप समेत भएको छ।
प्रहरीले विरोधमा उत्रिएका दलका नेता तथा कार्यकर्तामाथि लाठीचार्ज गर्नुको साथै अश्रुग्यास समेत प्रहार गरेको छ।
जिल्ला प्रहरी कार्यालय धनुषाका प्रमुख प्रहरी उपरीक्षक रूँगम बहादुर कुँवरले स्थितिलाई नियन्त्रणमा लिन अश्रुग्यास प्रहार गर्नुपरेको बताए।
प्रहरी र प्रदर्शनकारीबीच झडप भएपछि मधेस भवन अगाडिको क्षेत्र तनावग्रस्त बनेको छ।
-1762864241.jpg)
-1746009348.jpg)
