मधेस प्रदेशका मुख्यमन्त्री जितेन्द्र प्रसाद सोनार (सोनल) को राजीनामा स्वीकृत भएको छ।
शनिबार मधेस प्रदेश प्रमुख सुमित्रा सुवेदी भण्डारीले सोनलको राजीनामा स्वीकृत गरेकी हुन्।
सदनमा शनिबार विश्वासको मत नपाउने देखेपछि मुख्यमन्त्री सोनलले राजीनामा घोषणा गरेका थिए। त्यसपछि उनले प्रदेश प्रमुख सुवेदी समक्ष राजीनामा पत्र बुझाएका थिए।
उनले विश्वासको मतका लागि समय लिए पनि नपाउने स्थिति बनेको थियो।
लोकतान्त्रिक समाजवादी पार्टीका नेता सोनल गत असोज २९ मा प्रदेशसभामा प्रतिनिधित्व गर्ने पाँच दलको समर्थनमा मुख्यमन्त्री नियुक्त भएका थिए।
उनलाई नेपालको संविधानको धारा १६८ को उपधारा २ बमोजिम मुख्यमन्त्री पदमा नियुक्त गरिएको थियो। मुख्यमन्त्री बन्दा ५ दलको ५६ जनाको समर्थन रहेको बताइए पनि उनले विश्वासको मत भने जुटाउन सकेनन्।
प्रदेशसभामा लोसपाको ८, जसपा नेपालको १८, जनमतको १३, नेकपा माओवादी केन्द्रको ९ र एकीकृत समाजवादीको ७ सिट छ। एक सिट रहेको नागरिक उन्मुक्ति पार्टीले उनलाई विश्वासको मत दिने चर्चा थियो।
१०७ सदस्यीय प्रदेशसभामा सरकारका लागि ५४ प्रदेशसभा सदस्यको समर्थन आवश्यक थियो।
तर निवर्तमान मुख्यमन्त्री सतिश कुमार सिंह र त्रिभुवन शाह प्रदेशसभामा बैठकमा उपस्थित नै भएनन्।
मत दिने आश्वासन दिएको संघीय समाजवादी पार्टीका सांसद बिमला अन्सारी पनि प्रदेश सभा बैठकमा अनुपस्थित भइन्।
माओवादी केन्द्रका रहवर अन्सारी र माला राईले सदनमै विद्रोह गरे। अन्सारीले आफैलाई कालोमोसो दलेर विरोध जनाएका थिए।
-1746009348.jpg)
