पूर्वराष्ट्रपति विद्यादेवी भण्डारीले केही पनि आलोचनाभन्दा बाहिर नरहेको र आफू पनि हुन नसक्ने बताएकी छन्।
उद्घोष दैनिकको वार्षिक कार्यक्रममा सहभागी हुन विराटनगर पुगेकी भण्डारीले विराटनगर विमानस्थलमा सञ्चारकर्मीसँग कुराकानी गर्दै आफू अहिले पनि एमालेका लागि काम गरिरहेको र पार्टी औपचारिक कुरा थाहा नभएको बताइन्।
‘म नेकपा एमाले नै हो, एमाले भएर राष्ट्रपतिमा निर्वाचित भएकी हुँ, त्यसैले गर्दा म एमालेको कार्यकर्ता हो। जहाँसम्म म पनि आलोचनाभन्दा मुक्त छैन, कोही पनि छैन,’ उनले भनिन्।
उनले आफ्नो सदस्यताको विषयमा धेरै छलफल गरिरहनुपर्ने आवश्यकता नरहेको बताइन्।
‘म एमालेको कार्यकर्ता हुँ। एमालेको लागि काम गर्ने हुँ। पार्टीले निर्णय गरेर पठाएको हो। पार्टीको औपचारिक कुरा के छ, मलाई त्यो थाहा भएन। सदस्यहरूलाई सबैकुरा थाहा हुँदैन नि! कमिटीमा बस्नेहरूलाई थाहा होला नि। म त कमिटीमा छैन,’ उनले भनिन्।
उनले राजतन्त्र र गणतन्त्र फरक भएको बताउँदै राजा व्यक्ति र राष्ट्रपति एउटा पद भएको र यो आवधिक हुने तर्क गरिन्।
‘जुनसुकै जनताको छोराछोरी निर्वाचित राष्ट्रपति हुनसक्छन्, उनीहरूको कार्यकाल सकेपछि आफ्नो नागरिक जीवनमा फर्कन सक्छन्,’ उनले भनिन्।
उनले आफ्नो सदस्यता कसैले खोस्न नसक्ने तर्क गर्दै पार्टी सदस्य भएकै ४५ वर्ष भइसकेको बताइन्।
अहिले पार्टीमा संगठित सदस्यको जे भूमिका हुन्छ त्यही रहेको बताइन्।
‘मेरो सदस्यता कसैले खोसेको छैन। छलफल हुनसक्छ। म राष्ट्रपति पार्टी निर्णय गरेर भएको हो। राष्ट्रपति हुँदा नै म सदस्य भएको ३५ वर्ष भइसकेको थियो। अहिले ४५ वर्ष भइसकेको छ,’ उनले भनिन्।
-1746009348.jpg)
