७८ लाख रुपैयाँ 'घुस डिल' गरेकोसम्बन्धी अडिओ सार्वजनिक भएपछि संघीय मामिला तथा सामान्य प्रशासन मन्त्रीबाट राजकुमार गुप्ताले राजीनामा दिए।
गुप्ताले भूमि आयोग कास्कीको अध्यक्ष बनाउन २५ लाख र मालपोत कार्यालय कास्कीको तत्कालीन प्रमुखको सरूवा रोक्न ५३ लाख घुस लेनदेनसम्बन्धी 'डिल गरेको' अडिओ सार्वजनिक भएको थियो।
तर उक्त प्रकरणका विविध पाटा भने अझै पनि बाहिर आउने क्रम जारी छ।
मन्त्रीले राजीनामा दिए पनि उनीमाथि पक्राउ गरी अनुसन्धान गर्न माग भइरहेको छ।
यसबीच सेतोपाटीको सम्पर्कमा आएका एक जना मन्त्रालयका कर्मचारीले गुप्ताले दुई महिनाअघि मन्त्रालयमै गरेको एक छलफलका कुराबारे बताएका छन्।
ती कर्मचारीका अनुसार मन्त्री गुप्ताले सचिव, दुई जना सहचिव राखेर आफ्नो दैनिक खर्च नै डेढ लाख रहेको भन्दै त्यो पैसा 'म्यानेज' गर्नुपर्ने बताएका थिए।
‘दुई महिनाजति अघिको कुरा हो, मन्त्री गुप्ताले सचिव र दुई जना सहसचिवलाई राखेर मन्त्रालयमै भन्नुभयो- मेरो दैनिक किचन खर्च नै डेढ लाख बढी छ, राजनीतिक गरेकोले विभिन्न मानिस भेट्न आइरहन्छन्। यत्रो खर्च कसरी मैले जुटाउनू, उठाउनुपर्यो नि!’ भन्दै मन्त्रीले अनधिकृत खर्च उठाउन दबाब दिने गरेको ती कर्मचारीले बताए।
यसबारे गुप्तासँग सेतोपाटीले पटक-पटक फोन र लिखित प्रश्न पठाएर प्रतिक्रिया मागे पनि उनले जबाफ दिन चाहेनन्।
यो पनि:
घुस डिल अडिओमा मुछिएका मन्त्री राजकुमार गुप्ताले दिए राजीनामा
घुस डिल अडिओमा मुछिएका मन्त्री गुप्ताले राजीनामा दिनुअघि के भएको थियो बालुवाटारमा?
-1746009348.jpg)
