नेकपा (माओवादी केन्द्र) का उपाध्यक्ष एवं पूर्वसभामुख अग्निप्रसाद सापकोटाले देश बनाउन पार्टी अध्यक्ष पुष्पकमल दाहालको विकल्प नरहेको बताएका छन्।
सोमबार पार्टी केन्द्रीय कार्यालय पेरिसडाँडामा आयोजित एक कार्यक्रमलाई सम्बोधन गर्दै उनले यस्तो बताएका हुन्।
उनले देश बनाउनका लागि आफूहरूले अध्यक्ष दाहालको विकल्प नरहेको कुरा पहिला नै बुझेको तर अहिले आएर जनताले पनि बुझेको बताए।
उनले माओवादीको देश दौडाहाका क्रममा पार्टीबाट निर्वाचित जनप्रतिनिधिहरू बाहेक अन्य पार्टीबाट निर्वाचित जनप्रतिनिधिहरूले पनि स्वागत गर्ने, ज्ञापनपत्र दिने काम गरेको बताए।
उनले अहिले जनता कांग्रेस र एमालेबाट अघाएको बताउँदै माओवादीलाई बाटो खाली भएको जिकिर गरे।
उनले कांग्रेस प्रजातान्त्रिक सामन्तहरूको पार्टी भएको आरोप समेत लगाए।
उनले एमालेको कामले आफ्नै कार्यकर्ताहरू पनि शिर निहुँराएर लज्जाबोध गर्ने गरेको बताए।
उनले भने, ‘अहिले कांग्रेसलाई पनि नजर भरी भरी हेरिरहेका छन्। एमालेलाई पनि हेरिरहेका छन्। अझ कांग्रेस त त्यस्तै पार्टी हो। हामीले जानेकै पार्टी हो। त्यो प्रजातान्त्रिक सामन्तहरूको पार्टीमा मान्छेलाई धेरै आशा थिएन। तर एमालेका कार्यकर्ताहरूको हामी जहाँ जहाँ पुग्यौं, त्यहीँ त्यहीँ शिर निहुँरिएको छ। उनीहरू असाध्यै लज्जास्पद छन्। एक प्रकारले हामीलाई मैदान खाली थियो। सबैले हाम्रो पार्टीबाट निर्वाचित भएकाले त स्वागत, सम्मान, अभिनन्दन, मागपत्र पेस गर्ने वा ज्ञापनपत्र पेस गर्ने कुरा भयो।’
उनले अघि भने, ‘कांग्रेस, एमालेबाट निर्वाचित भएकाहरूले पनि बाटोमा जुनजुन पालिकाहरू परे तिनीहरूले हामीलाई भित्री हृदयदेखि नै भविष्यको नेतृत्व माओवादीले गर्नुपर्छ, त्यसमा पनि पार्टी अध्यक्ष कमरेड प्रचण्डको विकल्प छैन भन्ने कुरा हामीले त बुझेको कुरा हो। जनताले पनि त्यो बुझे।’
उपाध्यक्ष सापकोटाले शहीद परिवारबाट तर्केर हिँड्ने कुराको अन्त्य हुनुपर्ने बताए। —न्युज एजेन्सी नेपाल
