त्रिभुवन विश्वविद्यालयका उपकुलपतिको सचिवालय तोडफोड गरेको आरोपमा पक्राउ परेका व्यक्ति सानोठिमी क्याम्पसका स्वतन्त्र विद्यार्थी युनियन (स्ववियु)का सचिव रहेको खुलेको छ।
मंगलबार जिल्ला प्रहरी परिसर काठमाडौंको टोलीले भक्तपुर बस्ने दिक्पाल कार्कीलाई पक्राउ गरेको हो। परिसरका प्रवक्ता एसपी अपिलराज बोहराले उनलाई भक्तपुरबाट पक्राउ गरिएको बताए।
पक्राउ परेका व्यक्ति स्ववियु सानोठिमी क्याम्पसका सचिव समेत रहेको खुलेको हो। उनी नेपाली कांग्रेसको भ्रातृ संगठन नेविसंघबाट सचिव भएका थिए।
जेठ १४ गते उपकुलपतिको सचिवालयमा उनीसहितको समूहले तोडफोड गरेको आरोप छ।
कार्की पक्राउ परे पनि अरू भने फरार छन्। उनीहरू नेविसंघ आबद्ध विद्यार्थीहरू थिए। स्नातक तहको भर्ना पुन: खोल्न माग गर्दै उनीहरूले तोडफोड गरेका थिए।
जबकि त्रिविले माघमै भर्ना गर्ने काम सकिसकेको थियो। स्नातक तह प्रथम वर्षको परीक्षाका लागि फारम खुलिसकेको अवस्था रहेको भन्दै त्रिविले अहिले फेरि भर्ना खुलाउन नमिल्ने बताएको थियो।
यसरी तोडफोड गरेपछि त्रिवि प्रशासनले तोडफोड गर्नेलाई कारबाही गर्न सरकारसँग माग गरेको थियो।
गत बिहीबार मात्रै उनीसहितले रिपोर्टर्स क्लबमा पत्रकार सम्मेलनसमेत गरेका थिए।
उनले उक्त पत्रकार सम्मेलनमा विद्यार्थीको हकहितका लागि काम गर्दा त्यस विपरीत समाचारहरू प्रकाशित भएको भन्दै असन्तुष्टि जनाएका थिए।
‘विद्यार्थीका लागि आन्दोलन गरिरहेका थियौं। विद्यार्थीका हकका लागि लडिरहेका थियौं। त्यसको विपरीत समाचारहरू आए,’ उनले भने, ‘एक महिनाभन्दा अघि देखि स्ववियु चुनावका कारण भर्नाका लागि टियु धाउँदै थियौं। रजिष्ट्रार, भिसी लगायत सम्पूर्ण कर्मचारीहरूले लुकामारी गर्नुभयो।’
उनले आफूहरूलाई उपकुलपतिले फोनमा भर्ना नखुल्ने भनेपछि उच्छृंखल भएको बताएका थिए। त्यसदिन आफूहरू त्रिविमा उपकुलपति खड्ग केसीलाई भेट्न गएको तर आफूहरू जाँदा प्रहरी प्रशासन रहेको उनले बताएका थिए।
‘हामी भिसी सरलाई कुर्छौं भन्दा एक डेढ घण्टासम्म पनि नआएपछि भक्तपुर सभापति ज्युले फोन गर्नुभयो। हामी त्यहाँ आउँदैनौं, भर्ना खुल्दैन भनेर हामीलाई उच्छृंखल बनाउनुभएको हो,’ उनले भनेका थिए।
उनले उपकुलपति केसीलाई पत्रकार सम्मेलनमार्फत त्रिभुवन विश्वविद्यालय नै तोडफोड गर्ने चेतावनी समेत दिएका थिए।
यो पनि: त्रिविमा गुण्डाराज: परीक्षाको फाराम खुलिसकेपछि विद्यार्थी भर्नाको माग गर्दै तोडफोड
भर्ना खोल्न माग गर्दै नेविसंघले गर्यो त्रिवि उपकुलपति कार्यालय तोडफोड (तस्बिरहरू)
उपकुलपतिको सचिवालय तोडफोडमा संलग्नमाथि त्रिविले बढायो कानुनी कारबाही प्रक्रिया
