प्रधानमन्त्री केपी शर्मा ओलीले सही कुराको समर्थन गर्दा झोले भनिन्छ भनिन्छ भने त्यसमा आफूलाई अफ्ठ्यारो नलाग्ने बताएका छन्।
शनिबार काठमाडौंमा बुद्धिजिवी परिषद्को महाधिवेशनमा प्रधानमन्त्री ओलीले गुलामी र दास मनोवृत्तिका मान्छेहरूका तथाकथित निष्पक्ष र आलोचनात्मक चेतका भ्रममा नपर्न आग्रह गर्दै राम्रा कुराहरू राखिएको झोला बोकेर हिँड्नु गर्वको कुरा रहेको बताएका हुन्।
'सही कुरालाई समर्थन गर्दा झोले?,' प्रधानमन्त्री ओलीले भने, 'मलाई अलिकति पनि अप्ठ्यारो लाग्दैन, म जनताको झोला बोकेर हिँड्ने मान्छे हुँ। जनताको हित, राष्ट्रको हित र इज्जतको झोला बोक्ने, राष्ट्रको गौरवको झोला बोक्ने र परिवर्तनको झन्डा माथि उठाउने एउटा झोले हुँ।'
प्रधानमन्त्री ओलीले आफूले कुनै सामन्तको दुई कौडी लिएर उनीहरूको झोला नबोकेको पनि बताए।
'फालिसकेको राजतन्त्रको पक्षमा म रैतान हुन तयार छु भनेर नारा लगाउन हुने। म स्वतन्त्र मानव होइन, नागरिक सर्वोच्चता स्वीकार्ने मान्छे होइन म प्रभुको दास हुन तयार मान्छे हुँ भनेर कबुलियतनामा गर्न लाज नहुने। ती झोले नहुने?,' प्रधानमन्त्री ओलीले भने।
'इतिहासलाई जस्ताको तस्तै बुझ्ने, राख्ने र सही बाटोमा अगाडि बढाउँदा म नेकपा एमालेको झोले हो। म यस देशका जनताको झोले हो। अब चित्त बुझ्यो प्रतिक्रियावादीहरूलाई? म कबुल गर्छु झोले हुँ,' प्रधानमन्त्री ओलीले अगाडि भने।
उनले राम्रा कुराहरू बोक्नकै लागि झोला बनेको बताए।
'राम्रा कुरा बोक्न बनेको झोलामा दलाली हालेर बोक्छन् यिनीहरू। राम्रा कुरा बोक न त्यो झोलामा । झोले हुनुमा गर्व छ तर राम्रो कुरा बोकेर हिँड्नमा गर्व छ,' उनले भने।
प्रधानमन्त्री ओलीले झोले भन्नेहरू आएको निर्देशन पालना गर्ने मेसिनजस्ता रहेको टिप्पणी गरे।
'हामीलाई झोले भन्नेहरु पनि देख्दा मात्रै मान्छेजस्ता हुन्। ती पनि एक प्रकारका मेसिनजस्तै हुन्। जे आदेश आउँछ त्यो पालना गर्ने,' उनले भने।
त्यसकारण सामाजिक सञ्जालमा चारवटा कमेन्ट आउँदैमा त्यसको पछाडि नलाग्न प्रधानमन्त्री ओलीको आग्रह थियो।
'बुस्ट गरेर आएका कमेन्टहरू। त्यहाँ भित्र मान्छे छैन। मेसिन प्रयोग गरेर अर्काको चरित्र हत्या गरिएको छ। त्यस्ता कमेन्टका पछाडि नलाग्नुस्। त्यो त जे अह्रायो त्यही गर्ने विचरा मेसिनको कुरा हो। मान्छेको बुद्धिको कुरा होइन,' उनले भने।
त्यस्ता 'मेसिन'हरू कहिलेकाँही हुकुम लिन जाने गरेको पनि देखिने प्रधानमन्त्री ओलीले बताए।
'अधिवेशनबाट निर्णय हुने होइन। हुकुमबाट निर्देशन हुन्छ त्यही पालना गर्छन्,' उनले भने।
त्यसकारण परिवर्तन, राष्ट्रिय हित र स्वाभिमानको झन्डालाई माथि उठाएर हिँड्नका लागि उनले बुद्धिजिवीहरूलाई आग्रह गरे।
'नेपाली जनतालाई विभिन्न ढंगले विभाजित गर्न खोजिन्छ। यो र त्यो भनेर विभाजित हुन नदिनुस्। हामी राष्ट्रिय एकताको भावसहित राष्ट्र निर्माणमा अघि बढ्नुपर्छ,' प्रधानमन्त्री ओलीले भने।
