स्वतन्त्र सांसद अमरेशकुमार सिंहले गभर्नर नियुक्ति प्रक्रिया देखेर लाज पनि लजाउने टिप्पणी गरेका छन्।
बुधबार प्रतिनिधि सभाको विशेष समयमा बोल्दै सांसद सिंहले गभर्नर नियुक्ति प्रक्रिया, त्यसको सिफारिस समितिमा प्रत्येक १० दिनमा सदस्य हेरफेर लगायका कुराहरू देखेर लाज पनि लजाउने बताएका हुन्।
'तर हाम्रो यो सरकार लजाउँदै,' उनले भने।
उनले चुनाव हारेकाहरू राष्ट्रिय सभामा जाने र राजदूतसम्म बन्ने परम्परा रहेकोमा अब गभर्नर नै बनाउन खोजिएको बताए।
'गलत परम्परा हो। कुनै पनि राजनीतिक दलको सदस्य गभर्नर हुन सक्दैन भनेर राष्ट्र बैंकको ऐनमै स्पष्ट छ,' उनले भने।
सिंहले राष्ट्र बैंक भित्रबाटै गभर्नर बनाउन सकिने पनि बताएका छन्।
'राष्ट्र बैंक यत्रो वर्षदेखि चलिरहेको छ त्यहाँ कुनै विज्ञ छैन? भित्रबाट बनाउँदा पाप लाग्छ? बाहिरकै मान्छे राख्नुपर्ने? आफ्नै दलको कार्यकर्ता राख्नुपर्ने?,' उनले भने।
उनले अहिलेको डेपुटी गभर्नरलाई गभर्नर बनाउन नहुने कारण नभएको पनि बताए।
'डेप्युटी गभर्नर छ त्यसैलाई बनाइदिए के हुन्छ? महिला भएको कारण उहाँलाई बनाउन मिल्दैन? राष्ट्र बैंकको कर्मचारी भएका कारण उहाँलाई बनाउन मिल्दैन?,' उनले भने।
उनले सर्च कमिटीलाई पनि मजाक बनाइएको बताए।
'सर्च कमिटी मजाक हो? हरेक दस दिनमा नियुक्त हुने र दस दिनमा राजीनामा दिने। हलीलाई नियुक्ती गर्ने र अर्को जिम्मेवारी पाए त्यो राजीनामा गराउने,' उनले भने।
