नेकपा (माओवादी केन्द्र)को स्थायी कमिटी बैठक शनिबार पनि बस्दैछ।
पार्टी केन्द्रीय कार्यालय पेरिसडाँडाँमा शनिबार बिहान ११ बजेबाट बैठक सुरू हुने पार्टी प्रवक्ता समेत रहेका उपाध्यक्ष अग्नि सापकोटाले जानकारी दिए।
शनिबारको बैठकमा स्थायी कमिटी सदस्यहरूले धारणा राख्नेछन्।
शुक्रबारदेखि सुरू भएको बैठकको पहिलो दिन अध्यक्ष पुष्पकमल दाहाल 'प्रचण्ड'ले समसामयिक राजनीतिक विषयमा ब्रिफिङ र बैठकको एजेन्डा प्रस्तुत गरेका थिए।
शुक्रबार अध्यक्ष प्रचण्डले राखेको एजेन्डामाथि स्थायी कमिटी सदस्यहरूले शुक्रबार धारणा राख्ने प्रवक्ता सापकोटाले बताए।
सदस्यहरूलाई बोल्नका लागि १० मिनेटको समय निर्धारण गरिएको पनि उनले बताए।
जारी स्थायी कमिटी बैठकमा पार्टी अभियानलाई निरन्तरता दिने, संगठनलाई बलियो बनाउने र समाजवादी मोर्चालाई थप सक्रिय बनाउने विषयमा छलफल हुने एजेन्डा तय भएका छन्।
संगठन निर्माण र नेताहरुको कार्यविभाजनबारे पनि जारी बैठकको एजेन्डा छन्। सोही एजेन्डामा रहेर शुक्रबार अध्यक्ष प्रचण्डले ब्रिफिङ गरेका थिए।
त्यस्तै यही बैठकले पार्टीको आगामी केन्द्रीय कमिटी बैठकको मिति तय गर्नेछ।
शुक्रबार अध्यक्ष प्रचण्डले केन्द्रीय कमिटी बैठक दसैँपछि गर्न प्रस्ताव राखेका थिए।
ती प्रस्तावबारे पनि शनिबार स्थायी कमिटी सदस्यहरूले आफ्नो धारणा राख्नेछन्।
माओवादी स्थायी कमिटीको आकार ४४ सदस्यीय छ।
-1746009348.jpg)
