सुदूरपश्चिम प्रदेशका मुख्यमन्त्री कमलबहादुर शाहले सुरक्षा निकायका प्रमुखहरूसँग छलफल गरेका छन्।
प्रदेशको समग्र शान्ति सुरक्षाको अवस्था लगायत लागुऔषध नियन्त्रण जस्ता विविध विषयमा शुक्रबार उनले छलफल गरेका हुन्।
मुख्यमन्त्री तथा मन्त्रिपरिषद्को कार्यालयमा मुख्यमन्त्री शाहले सुरक्षा निकायका प्रमुखहरूसँग लागुऔषध नियन्त्रण, सीमामा हुने आपराधिक क्रियाकलाप नियन्त्रण र सीमा क्षेत्रमा सहज आवागमनका विषयमा छलफल गरेको उनको सचिवालयले जानकारी दिएको छ।
छलफल विशेष गरी सीमा क्षेत्रमा बढाइएको सुरक्षा निगरानीका विषयमा छलफल भएको थियो।
सीमाबाट हुने लागुऔषध नियन्त्रण, आपराधिक क्रियाकलाप नियन्त्रण र चोरीका घटनाहरू बढिरहेको अवस्थामा सीमा निगरानी कडाइमा लाग्न शाहले सुरक्षा निकायका प्रमुखहरूलाई निर्देशन दिएका थिए।
छलफलमा सहभागी सुरक्षा निकायका प्रमुखहरूले लागुऔषध प्रयोगकर्ता भन्दा त्यसका कारोबारीलाई समात्ने गरी रणनीति बनाइएको मुख्यमन्त्रीलाई अवगत गराएका थिए।
छलफलमा विभागीय मन्त्रीहरू, विभागीय सचिव, प्रमुख जिल्ला अधिकारीको सहभागिता थियो।
सुदूरपश्चिमका प्रहरी प्रमुख प्रहरी नायब महानिरीक्षक डम्बर बहादुर विक, नेपाल सशस्त्र प्रहरी नायव महानिरीक्षक–सशस्त्र प्रहरी बल ७ नं. वैद्यनाथ बाहिनीका प्रमुख प्रदिपकुमार पाल, राष्ट्रिय अनुसन्धान सुदूरपश्चिम प्रदेशका प्रदेश कार्यालयका प्रमुख अनुसन्धान निर्देशक बालनरसिंह राणा, जिल्ला प्रहरी कार्यालय कैलालीका प्रमुख प्रहरी उपरीक्षक प्रहरी उपरीक्षक खडकबहादुर खत्री लगाएतका सुरक्षा अधिकारीहरूको उपस्थिति थियो।
