राष्ट्रिय स्वतन्त्र पार्टी (रास्वपा) ले काठमाडौंकेन्द्रित सडक आन्दोलन गरिरहेका शिक्षकहरूको माग सम्बोधन गराउने गरी संसदमा सशक्त रूपमा प्रस्तुत हुन आफ्ना सांसदहरूलाई निर्देशन दिएको छ।
बिहीबार बसेको केन्द्रीय समिति बैठकले विद्यालय शिक्षा विधेयकमा शिक्षकका माग समावेश गर्नका लागि सांसदहरूलाई निर्देशन दिएको हो।
संघीय संसद्काे बर्खे अधिवेशन वैशाख १२ गतेबाट सुरू हुँदैछ। अधिवेशनको सुरूमै शिक्षकहरूका माग पूरा गराउन विद्यालय शिक्षा विधेयक अगाडि बढाउने सरकारको तयारी छ।
‘राष्ट्रिय स्वतन्त्र पार्टीको आज बसिरहेको केन्द्रीय समिति बैठकले, लामो समयदेखि चाँडै शिक्षा विधेयक ल्याइयोस् भनेर आन्दोलनमा र विगत १५ दिनदेखि काठमाडौंमा सडक आन्दोलनमा रहेका शिक्षकहरूको माग न्यायोचित तरिकाबाट सम्बोधन गर्नको लागि वैशाख १२ देखि सुरू हुने संघीय सदनको अधिवेशनमा सशक्त रुपमा प्रस्तुत हुन संसदीय दललाई निर्देशन दिएको छ,’ पार्टीका कार्यवाहक प्रवक्ता मनिष झाले भने।
रास्वपाको केन्द्रीय समिति अहिले पनि पार्टी कार्यालय चःमतिमा बसिरहेको छ। बैठकमा महाधिवेशन सार्नेबारे छलफल भइरहेको छ।
