नेकपा (एमाले) को दुई जिल्ला मात्रै अधिवेशन गर्न बाँकी रहेका छन्।
एमालेका चार वटा जिल्ला कमिटीले अधिवेशनको म्याद गुजारेका थिए।
त्यसमध्ये सिराहा जिल्लाको अधिवेशन शनिबार सकिएको छ। अशोक यादवको नेतृत्वमा त्यहाँ १३५ सदस्यीय नयाँ कार्यसमिति निर्वाचित भइसकेको छ।
सप्तरी जिल्लाको अधिवेशन शनिबारबाट सुरू भएको छ। त्यहाँ पार्टी उपाध्यक्ष रामबहादुर थापा ‘बादल’ ले अधिवेशनको उद्घाटन गरेका थिए। त्यहाँको बन्दसत्र शनिबारबाटै सुरू भएको छ। आजबाट नेतृत्व चयनको प्रक्रिया सुरू हुनेछ।
एमालेमा भूगोलतर्फ ७७ र गैरभूगोलतर्फ ४ वटा जिल्ला कमिटी छन्। अब धनुषा र अछामको मात्रै जिल्ला अधिवेशन बाँकी रहेका छन्।
यी दुवै कमिटीको अधिवेशनको मिति तोकिइसकेको केन्द्रीय निर्वाचन आयोगका प्रमुख विजय सुब्बाले जानकारी दिए।
उनका अनुसार धनुषाको जिल्ला अधिवेशन वैशाख २० गते तोकिएको छ।
अछामको जिल्ला अधिवेशन वैशाख १२, १३ र १४ गते निर्धारण गरिएको सुब्बाले बताए।
यसैबीच एमालेले वडा तहमा संगठन सुदृढीकरण र परिचालनका लागि जराकेन्द्रित अभियान पनि चलाइरहेको छ।
