राष्ट्रिय स्वतन्त्र पार्टीका (रास्वपा) सभापति रवि लामिछानेले पर्साको सानोपाइला सहकारीको मुद्दालाई हतियारको रूपमा राखिरहेको बताएका छन्।
उनले प्रतिनिधि सभाका सभामुख देवराज घिमिरेलाई मंगलबार भेटेर आफ्नो निलम्बन फुकुवाको माग गरेका थिए। त्यसपछि सञ्चारकर्मीसँग कुराकानी गर्दै सानोपाइला बचत सहकारीको मुद्दालाई हतियारको रूपमा राखेको सभापति लामिछानेले बताए।
उनले एक जना पत्रकारले ‘पर्साको बिलम्बलाई कसरी हेर्नुभएको छ?’ भनेर प्रश्न गरेका थिए।
‘पर्साको बिलम्बलाई तपाईंहरूले कसरी हेर्नुभएको छ, आम जनताले जसरी हेरेको छ। मेरो हेराइ पनि त्यही भन्दा फरक कहाँ छ र! सकेसम्म कानुनी प्रक्रियाहरू टुंगियुन्, मुद्दा कहाँकहाँ लगाउने हो लगाऊन्। त्यो सबै सकेर अनि आउँ भनेर कुरेर बसेको,’ उनले भने, ‘किनभने अदालतलाई पनि सम्मान गर्नपर्यो। कतिपय प्रश्नहरू पनि आउला भनेर कुरिरहेको थिएँ। तर सरकारले त्यसलाई हतियार बनाएर राखेर, पर्सा चाहि, हदम्याद छ, झुण्ड्याइराखेको छ। मान्छे लगाएर हालिएको मुद्दा हामीलाई सबै थाहा छ नि।’
लामिछाने पक्राउ परेपछि पर्सा प्रहरीले पनि बयान लिएको थियो। तर अझै पनि मुद्दा भने दर्ता गरेको छैन।
त्यस्तै एकैपटक चार वटा मुद्दा दर्ता भएकाले एकैदिनमा चार वटा अदालतमा हाजिर हुन कठिन हुने पनि उनले बताए।
कास्की जिल्ला अदालत, काठमाडौं जिल्ला अदालत, रूपन्देही जिल्ला अदालत र चितवन जिल्ला अदालतमा मुद्दा दर्ता भई उनी पुर्पक्षको लागि धरौटीमा छुटेका थिए। पुर्पक्षको लागि धरौटीमा छाड्ने आदेशलाई बदर गरी साधरण तारेखमा राख्न लामिछानेले र थुनामा राख्न माग गरी सरकारी पक्षले उच्च अदालतमा निवेदन दिएका छन्।
त्यसैको पेसीको विषयमा उनले एकै जना चार वटा अदालतमा धाउन कठिन भएको बताएका हुन्।
‘बिहीबारको दिन म एक जना मान्छे। चार-चार वटा अदालतमा, अर्को मुद्दा लागेपछि पाँच वटा हुन्छ। उच्च अदालतमा हाजिर हुन पर्छ। सम्भव छ? एकैदिन। एउटा मान्छे एकै दिन चार ठाउँमा जान पर्छ, सम्भव छ?,’ उनले भने।
