राष्ट्रिय स्वतन्त्र पार्टी (रास्वपा) की सांसद सोबिता गौतमले सरकार नियन्त्रणमुखी बाटोमा गइरहेको बताएकी छन्। प्रतिनिधि सभाको बुधबारको बैठकमा बोल्दै उनले सरकारले जनविश्वास गुमाइसकेको निष्कर्ष निकालेकी हुन्।
‘मैले पटकपटक भन्दै आइरहेको छु सरकार नियन्त्रणमुखी बाटोमा गइरहेको छ। म देख्छु सरकार अत्यधिक सतर्क, असहिष्णु र उदाउँदै गरेको नयाँ आवाजहरूलाई दमन गर्न उद्यत छ। त्यसले के देखाउँछ भने सरकारले जनविश्वास गुमाइसकेको छ। गम्भीर संकटमा छ। तर यो संकट सरकार आफैले निम्त्याएको हो। सरकारले कानुनलाई न्यायका तराजु बनाउनुपर्ने थियो। तर प्रतिशोधको तरबार बनायो,’ उनले भनिन्।
गणतन्त्रमा जन्मिए, हुर्किएका उदाउँदै गरेको नयाँ शक्तिमाथि प्रतिशोध साँधिएको उनले बताइन्। यी शक्ति लोकतन्त्र जोगाउने पहिलो पंक्तिमा उभिन सक्ने पनि उनको धारणा थियो।
‘उदाउँदै गरेको नयाँ शक्ति जो यही गणतन्त्रमा जन्मिए, हुर्किए र लोकतन्त्र जोगाउने पहिलो पंक्तिमा उभिन सक्थे उनीहरूलाई नै झुठा मुद्दा लगाएर दमन गर्ने प्रयत्न गरिरह्यो। सदनमा प्रश्नको जवाफ नदिने, उल्टो प्रश्न गर्ने सांसदलाई होच्याउने, पत्रकारहरूको पास खोस्ने, सामाजिक सञ्जाल नियन्त्रण गर्न विधेयक ल्याउने, निषेधित क्षेत्रहरू घोषणा गरेर सडकहरू कब्जा गर्ने, यी सबै नियन्त्रणमुखी शासनका लक्षणहरू हुन्। सरकारले सदन, सडक सामाजिक सञ्जाल सबै नियन्त्रण गर्न सक्ला, जनताको चेतना नियन्त्रण गर्न सकिँदैन,’ उनले भनिन्।
उनले सरकारबाटै लोकतन्त्र खतरामा रहेको बताइन्। सबैको विचार अट्ने व्यवहार गर्न पनि आग्रह गरिन्। ‘सबैको विचार अट्ने व्यवहार गर्नुस् नत्र परिणाम जनताको पक्षमा हुनेछ। यो सरकारलाई नयाँ पुस्ताको चेतावनी हो,’ उनले भनिन्।
